Kopi Sianida

Mula ngancan buduh pamineh manusane jani. Sing mikir dawa, ulah laku malaksana. Megatang angkian timpal cara nyagal siap. Geres, geres..! Cara ngelatig cicing baan gegitik, klepok kampuang..! Cara nyetrum lan nuba be di tukade. crott..crott..!!

Imih... dewa ratu! Ija kaden wiwekane! Timpal sai ajak masuk, medem bangun bareng, kadirasa dedaaran saling rebutin, penganggo saling silih, jeg nadak sara peteng pitu nekepin, bani kanti megatang angkian timpalne.

Mirib, ne sajan pejalan Kali Yugane, ne joh ngancan paek, ne paek ngejohang, ne polos dadi jagal, ne bringas terkenal preman dadi pemangku, dadi pedanda. 

Pejalan pedatin dokare kenceng, itehane enggal meganti, sing tawang semengan memutih, tengaine suba sarwa selem, sing ja ngantosang endag ai gilirane teka. Buka ngecek ajin tiket pesawat, jani cek mael bin limang menit cek mudah, mara kar boking saget mael. Hemmm....!!

Keto suba imbayang tiang, unduk pebalihan beritane di tipi ungkuran jani. Wayan Mirna Salim ngalain ulian naar kopi ajaka timpal-timpalne. Kopi ane pesena ajak timpalne I Jesicca, kone misi natrium Sianida. Zat ane nyidang ngematiang jelema uling silib buka cetik utawi racun. 

Neh toh, timpal barengan ajaka masuk, gradag-grudug ipidan bareng-bareng kone di Australi, jani bisa mapineh ngencanin. Ngae sakit tur megatin angkian timpal. Duh dewa ratu....!! Jik ping..!!! tok..tok..tokk... (noktok benda datar ane dadi getok). 

Dumada ja sameton samian, sang sapa sira ja polih ngwacen geguratan tangane puniki, sida eling turmaning mulat sarira. Sering-sering bersyukur, ngaturang parama suksma ring Hyang Parama Kawi, ring Sang Hyang Tunggal. Mangda sida tajep papineh, raos lan parilaksana stata becik, ngmargiang pemargi satwika. Om Swaha. (2/1/2016-PKJ)