MEPANTIGAN

YEN BANI MAI "MEPANTIGAN"

mapantigan

Magulet saling tating, saling pantigang di tengah kubengan endut lan kasarengin baan suryakan penonton saling ilonin lan gambelan Bali pinaka ciri liang sang sane ngaksi, meriah gumanti kawentenane. Para pamilet taler ngancan semangat saling kaukin, saling tangtang, saling kuukin, "Yen bani mai mapantigan". Tan ja wenten manah kroda, iri utawi gedeg para pamilet sane wenten ring atraksi Mapantigan. Atraksi ngadu kawirangan khas pulau Dewata puniki dados bebalihan sane kasenengin olih para turis domestik lan turis mancanegara.  

Mirengang kruna "mapantigan", maciri pisan olahragane puniki kalakonin antuk anak lanang kekalih, saling guletin, saling pantigang, saling rejeg, muah saling tating. Nanging mapantigan puniki kalaksanayang ring arena sane maendut lan mayeh, sekadi carik.

Atraksi puniki ngamerluang katrampilan khusus lan percaya diri sang sane nglakonin, mangda presida bayune ageng pacang mantigang lawan. Mapantigan puniki boya ja sebates seni pertunjukan sane nontonang atraksi magulet lan saling pantigang kemanten. Para pamilet atraksi puniki patut sareng andil ngalukis emosinnyane nganggen campuran cet, endut lan bara api sane katiruang ring tengahing kanvas.

Sadurung atraksi puniki kakawitin, kaping arep kalaksanayang upakara, ngaturang banten penghormatan majeng ring Dewi Sri, Dewi sane nuenang genah kalangan (carik) atraksi mapantigane punika. Mangda sang pamilet ngamolihang kerahayuan lan keslametan selantang atraksi piniki memargi.

Atraksi mapantigan puniki kakripta antuk I Putu Winset Widjaya, dane wantah silih tunggil seniman beladiri tradisional Bali. Dane ngadungang unsur-unsur pencak tradisional khas Bali sareng unsur-unsur igelan kecak ring atraksi mapantigan puniki.

Sane medayang Mepantigan puniki sareng pencak sane tiosan ring Indonesia, inggih punika pencak puniki akehan ngutamayang kuncian lan pantigan. Mangda macihna Bali, atraksi puniki madue ciri khas Balinnyane. Para pamilet atraksi Mepantigan patut ngangen pangangge khas Bali kuno. Pangangge puniki wantah kain utawi kamen sane kaseetang utawi kabuletgintingang (mangda sekadi celana) lan kapaduang antuk udeng batik khas Bali maseet ring sirah para pamiletnyane. (pandejul)