Teks Berjalan

Om Swastyastu, Sameton Sutha Abimanyu, Nyama Blijul ajak makejang.. Rahajeng rauh ring blog puniki, elingang follow ig @blijul_pande twitter @jul_pande Youtube: Blijul TV _ Om santih, santih, santih.

Sunday, November 25, 2012

Asu "Buron Sane Paling Satia"

Nak Bali miara asu sampun biasa, napi malih sane wenten ring desa, sabilang song (umah) madaging asu, wenten krama sane miara kekalih, tetiga, nah sabates aukud jeg pastika miara. Asu punika kanggen pinaka pangijeng utawi pecalang ring karang krama soang-soang. Yening sakadi baos lingsir-lingsire, nak sing ada buron ane paling satian kin cicing, kenken galak cicinge, sing taen lakar negor gustinne. Jam kuda ja teka gustine mulih, i cicing satia tetep ngantosang di abag angkul-angkule, ngutal-ngutilang ikuh pertanda ngemang salam ajak gustine. Kenten kocap kautaman asune pinaka buron ubuh-ubuhan. 

Kawentenan asu ring soang-soang natah taler kanggen pracici wenten tamiu sane rauh, kongkongan asune pinaka pratanda sang madue karang. Yen sakadi mangkine, asune pinaka bel rumah, ciri wenten tamiu rauh. Lian ring punika, yening wenten jadma corah sane pacang madaya jele ring pekarangan i raga, asune sampun sane pinih arep pacang mialangin jadma sakadi punika.

Sakemaon ungkuran puniki, akeh gatra indik katangehang wenten krama keni penyungkan rabies sangkaning kacegut asu. Asu inucap akehan asu-asu liar sane nenten wenten miara. Madasar antuk kawentenane punika, Pemprov. Bali miwah Pemkab. lan Pemkot. ring Bali akeh ngawentenang penertiban asu-asu liar puniki antuk  ngamademang asune punika tur ngicenin vaksin asu-asu ubuhan para kramane. Indik oprasi bebas rabies, pamademan asu-asu liar puniki, pemerintah taler akeh molihang kritik saking para janane, utaminnyane para pecinta anjing, punika taler saking para panglingsir adat ring Bali.

Panglingsir puri ring Denpasar ngaptiang majeng pemerintah ring Bali, sampunang ngulah laku ngamademang asu liar, "Asu punika taler kakardi antuk Ida Sang Hyang Widhi. Pateh ring i manusa, sane taler karipta antuk Ida Sang Hyang Widhi Wasa, mawinan sampun amati-mati ngulah laku," baos penglingsir puri Gerenceng-Pemecutan Anak Agung Ngurah Agung ring Denpasar sakadi sane kutip titiang ring Antara Bali.

Manut penglingsir puri inucap, pemerintah ring Bali patut ngrerehang pamargi sane becikan, mangdane sampunang kantos ngawetuang sesambat ring margine, "Yening sampun wenten asu jeg sampun kapademang".

Ngurah Agung ngawedarang, yening acoloh Krama Bali, asune punika kebaos wantah pinaka bebadihan saking adat, malahan ritual. Napi mawinan punika, santukan ri kanjekan ngamargiang makudang upacara ritual keagamaan umat Hindu Bali ngawigunayang asu pinaka sarana upakara utawi banten.

"Sampun saking nguni, Krama Baline sampun biasa miara asu. Selian wantah pinaka bebadihan utawi bagian adat, taler ritual. Lian ring punika kebaos asune utawi angson-angson puniki sepisan taler kanggen ngebag paumahan. Dadosnyane yening tan wenten suaran asu, puniki boya Bali wastane," tugesnyane.

Sangkaning pinaka pahan saking adat lan ritual, sepatutnyane ring sajeroning ngamademang asu-asune punika, pemerintah kapatut taler mangda ninutang para dedengkot utawi tokoh agama. Munguing dedengkot agama inggih punika, Krama sane pawikan utawi weruh, sapunapi sepatutipun sajeroning maparilaksana ring i baburon.

Yanin kapademang ngulah laku kadi mangkin, bangkenipun taler kaentungang ring dija? Ida taler maosang sangsaya pisan yanin asu-asu ring Bali kapademang ngulah laku, wekasan asu-asu khas Bali pacang sirna.

Manut penglingsir puri inucap, wenten pemargi sane pinih becik saihang ring pemargi kadi mangkin, inggih punika: Kramane mangda setata ngrangkeng asunya ring paumahan soang-soang. Lian ring punika taler buat mikayunin, sapunapi caranipun mangda asune tan makweh sane lekad. 

5 comments:

  1. Anjing ( ASU bahasa Balinya ) bagi tiang rare angon nak Bali belog merupakan penjaga Bali dari " kedatangan " tamu-tamu yang dengan sengaja akan mengusir Nak Bali dari Bali , sebaiknya tingkatkan keberadaan ASU di setiap rumah kita, setiap desa. Kalau Nak Bali sendiri sudah tidak bisa menjaga Bali ... biarlah ASU yang menjaganya ....

    ReplyDelete
    Replies
    1. Nak sifat asune uba menular ke manusane bli.. sifat manusane menular ke asune.. ddine mabading jani gumine...!! Manusa manumadi dadi buron, burone madumadi ddi manusa...! Hehehehehe...........!!

      Delete
    2. Suksma sampun simpang bli.......

      Delete

Wusan simpang, elingang komentarnyane ngih..! Ring colom FB ring sor taler dados. ^_^ sharing geguratane ring ajeng dados taler.