I SURADA TEKEN I WLECIT

Katuturang ring tengahing alas I Bojog ngajak I Pétu sedeng majugjag, nyugjagang indik kawéntenan don banah ngajak don gadung. Kasujatiané doné nak patuh, yén di alasé madan banah tur tusing mabunga, yén ané mabunga madan gadung. Nika tungkasanga ngajak I Bojog kalawan I Pétu. Peturu buron matungkas tan nyak kalahang. I Bojog ngorahang patuh banah ngajak gadung sing ja ada melénan. 

"Uli punya nganteg ke don patuh! apané orang cai malénan Pétu?" 

"Saja yén aliang disisi mula patuh ye Jog, sakéwala lén adané. Banah kalawan Gadung. Mapan ada ané mabunga lan sing mabunga. I gadung mabunga, I Banah tusing!". 

Saling tungkasin ipun makakalih. Jani mapan matungkas pada sing nyak kalahang, kaceritang I Bojog ngajak I Pétu ngalih pengadilan. Ané tundéna ngadilin madan I Surada ngajak I Wlecit. Ipun manyama ajaka dua. I Surada ngajak I Wlecit anak bebotoh tuak, sedeng demen-demena naar tuak. Minim-minum mabuk mabukan. Ngomong lantas I Bojog. 

"Nawegang jro, mawinan tiang rauh mriki jagi metakén. Tiang nunasang sareng jeroné makakalih, dados tiang ten uning iwang patut. Né mangkin jeroné jaga tunasin tiang. Nah yén umpaminé tiang iwang, tiang purun padem, nanging yén ipun iwang, ipun pademang". 

I Surada nyautin, "Nah, sujatiné apa masalahné maplekara?" 

"Niki masalah Banah kalawan Gadung, I Bojog ngorahang patuh, tiang ngorang ten” kéto I Pétu. Dadi nyamané né dadua mapitungan, I Wlecit ngajak I Surada bareng matungkas, I Wlecit ngorahang I Pétu ané beneh, mapan Banah kalawan Gadung mula malénan. Pelihanga kén belinné. 

"Ah.. da keto cai Wlecit!". 

"Men éngkén pematuté?" 

"Da masaut kéto, Cai namping tuak liu, apa lakar angon nimpalin? Kadén bé patut angon nimpalin! Né I Pétu orang cai beneh, nak ye mokoh si sing ye mati. Yén alih mula tutur sebenarné, I Bojog ané pelih, I Pétu ané beneh. Yén I Pétu ané benehang sing ye mati. I Bojog pelih, yén ye matiang nak berag, sinah béné abedik. Si sing man apa. Nah Jani paling melah I Pétu pelihang", keto ia I Surada ané kelihan. Pamuputné I Pétu ané beneh pelihanga. 

"Nah apa krana dadi cai pelih Pétu, sujatiné I tengkak kelawan I ngéngés, patuh saja gobané, sakéwala tuah pamesuané pada malénan. Yén I tengkak uli bibih, yén I ngéngés uli cunguh. Keputusané cai kalah, pelih cai Pétu". 

Kéto kaputusané. Ané beneh pelihanga, lantas matianga I Pétu kaplokina baan palu. Atman I Petu kajaga ban widiadara-widiadarine ajaka ka suargan, mapan ia beneh nyalanang kedharmaan. I Bojog lega tur malaib ka alasé mapan ia marasa menang maplekara. 

Kaceritayang I Surada ngajak I Wlecit ye maliang-liang minum tuak ngantos mabuk. Jani mapan béné nu liu sakéwala tuaké suba telah, orahina I Wlecit ngajak beliné buin ngalih tuak. 

"Né tuaké ba telah, bé nu liu, engkénang jani? Mu alih tuaké menék buin!" 

"Dija ngalih? Mara gantungang cang bungbungé menék. Né tuni ba tuunang cang, jani telah!" 

"Alih! alih jani menék. Sagét misi ngetél. Ngalih atenga kanggo ba!". 

Aliha menék tekén I Wlecit. Nganteg di duur empak banggulé ané penékina. Ulung I Wlecit laut mati. Ba kéto ada nyamané né gedénan ngalih adiné ke alasé mapan makelo tusing teka ngaba tuak, paling pejalane mapan ia punyah, lilita batisné tekén bun mingmangé sing ngidang mejalan, kauk-kauk aduh-aduh tusing ada nulungin ngemasin ia mati. Nah nika madan phala karmané ngenén. Apan I Surada ngajak I Wlecit malaksana tusing adil ngajak ané beneh. Guak ngamaling kuud. Satua bawak suba suwud. (JuL)