LUNGSURAN

"Dek, mai dek... nyurud malu! Ne memek mara teka uli maturan di Pura. Mai jemak lungsurane, pang sing enggalan juanga makejang ajak bli Putu kin I Komang. Mai nae ning, ne ada buah magenepan, jaja uli, iwel, begina, taluh masih ada,  jaen-jaen pesan. Tipate ajaka praniang ajak makejang, nak tunian dugas matanding banten semengane, nak suba begehen memek nyangin kacang, saur, gerang  masih misi. Kanguang jani sing mabe siap".

Enu setata tiang inget I Memek taktala suwud mabanten  utawi maturan di pura muah di sanggah. Kaukina suba tiang apang enggal-enggal teka, nunas lungsuran banten ane aturanga i tunian di pura. Dumina tiang ajak nyaman-nyaman tiange sakabedik. Sing ja taen mabinaan ngedumin, yen misi biu telung bulih, padum abulih tiang ajak panyaman tiange maan. Yen misi buah apel abesik, tebiha telu apele pada rata.

Yen kanti tiang marebut ngajak nyama, ulian belin tiange rengka ngambil buah utawi sane tiosan, lemekina teken I Memek lan I Bapa, "Sing dadi marebut, awak manyama ajak telu, patut saling dumin, adi-adine pang maan masih Tu, keto masih Kadek". Banban bana ngorahin, ngae tiang kimud teken reraman tiange tatkala tiang marebut ajak I Beli. Yen adin tiange I Komang anak nerima-nerima dogen, mapan nu ia nu cenik (mayusa limang (5) tiban), sing taen nyangetang keto. Malahan pabaliha beli-belinne miyegan marebutin lungsuran.

Di bale dangin inget tiang negak bareng a kluarga. Pepes piteketina baan tutur-tutur ayu, indik agama, budaya, krama lan kahanan hidup di marcapada. Keto masih ajaka makedekan tur maliang-liang ajak I Bapa lan I Memek, sambil satuaina masih baan satua-satua Bali, ane satata ngaenang tiang, beli lan adin tiange degeng, negak di duur dipane di bale dangin.

Satua ane paling pepes satuanga teken I Bapa, sing ja len tuah I Siap Selem, I Lutung teken sang Prabhu, I Beruk teken I Karuk, I Lutung teken I Tetani, Men Cubling, I Lutung teken I Yuyu, miwah satua-satua pawayangan lan tutur (nasehat). Yening I Memek ane nyatua, jeg suba pasti satuane I Dongding ajak I Cupak teken I Gerantang ane satuanga, mapan satuane ento dogen kone ane tawanga, kanti tiang apal satuane. Behh,, tan amat liang bayun tiange a keluarga, negak ngorta lan nyatua kangin kauh sambilang nyurud, nunas lungsuran.

Ane kanti jani enu masih tiang inget, silih sinunggil tuturnyane, I Bapa nuturang indik lungsuran. Tuturnyane yan keneh-kenehang tiang ne mangkin disubane gede, ngelah tiang bekel sarjana, aluh rasane ngraosang tuturne I Bapa. Sakewanten, saking tutur dangane punika titiang ngaresep antuk daging tuture daweg punika. Ane ngaenang tiang inget kanti jani.

"Putu, Kadek, ane suba madan masekolah, yen I Komang sing Bapa nakonin mapan enu madan cenik, konden nawang apa. Tawang ane cen madan banten?". Tujuang tiang sareng belin tiange sokasi (keben) sane kantun madaging lungsuran, sane  biasa suuna teken I Memek ritatkala maturan.

"Nah, beneh ento. Nanging pang tawang Putu jak Kadek, ene madan banten lungsuran. Mapan suba madan katur ring Ida Bhatara. Yening konden katur, dugas mara suud tandinga ajak I Memek semengane, ento madan banten sukla.  Sing ja ane mawadah sokasi ento dogen ane madan banten. Sekancan ane aturang iraga ka niskala, ane sing ngenah, ento madan banten.  To I Memek sabilang semengan suwud nyakan ngae jotan, to masih madan banten. Ritatkala iraga ngae banten, di bantene patut misi buah ane melah-melah, jaja ane jaen-jaen, misi tipat nyen nasi, be siap lan ane len-lenan".

"Disubane suwud mabanten, suba madan katur ring niskala, ento jani surud ajak makejang, ane ajeng cening jani, ento suba madan Lungsuran ada masih anake ngorahang paridan. Patut tunas ajak makejang. Ene suba kranane iraga ngaturang buah, jaja ane melah-melah, mapan iraga lakar nunas disubane katur. Sing ja ulian Ida Bhatara ane nagih pang aturin ane melah-melah lan jaen-jaen. Yen suba madan katur, ento suba madan mertane masari. Suba maan panugrahan olih Ida Bhatara-Bhatari kabeh".

"Iraga nak Hindu Bali sangkalanga liu ane dueg-dueg, yen nyak malajah, enggal nyusup papelajahane nak ulian pepes  nunas lungsuran, nunas sarin Ida Bhatara. Keto nyen pang tawang cening. Buin manian yen ada nak matakon, apang bisa cening nyautin petakone ento".  (pandejuliana)

Bali Pos-Bali Orti, Minggu, 19/2/2012