GENTA UTAWI BADJRA

Genta utawi Badjra

Sira sane ten uning ring genta, badjra utawi lumrah ida danene mawosang kleneng? Kleneng punika sering kacingakin ritatkala wenten pinandita utawi jero mangku miwah sulinggih/padanda muput yadnya. Kleneng yening kagambel (kagisiang) utawi kasuarayang nganggen tangan kiwa/kebot (ring Sulinggih sane magagelaran Siwa) kawastanin Genta, nanging yening kagambel (kagisiang) utawi kasuarayang antuk tangan tengen/kenawan (ring sulinggih magagelaran Budha) kawastanin Badjra.

Ring wawidangan kraman iragane sering pisan ida danene iwang penampen, Badjra kabawosang kruna halus saking genta. Kasujatiane kleneng puniki nenten ja madue kruna alus lan kasar, sawireh bajra/gentane puniki kabaosang sakral lan suci.

Ring lontar Kusumadewa kabaosang, yening ngamargiang swadharmaning sang maraga pamangku ritatkala nglaksanayang swadharmanyane (nganteb), pamangku patut nganggen genta, santukan kleningan suaran genta punika pinaka "bayu", mantra pinaka "sabda" lan acepan pikayun pinaka "idep", sane sampun ketah kabaosang antuk "Tri Guna", inggih punika lintang pasuwecan Ida Sang Hyang Widhi Wasa ring i manusa.

Pasuecane punika sane patut kasuksmayang (disyukuri) lan kaaturang ri tatkala dane Jero Mangku nuur Ida Bhatara ritatkala ngaturang Yadnya.

Suaran genta wenten tigang soroh, inggih punika:

1.   "Lembu Mangan Dukut" (suaran kroncongan lembu ri tatkala neda/ngamah padang), kanggen ritatkala ngamargiang upakara Dewa Yadnya.

2.   "Brama Ngisep Sari" (suaran dengung I Kumbang sane makeber pacang ngisep sarin bunga), kanggen ritatkala upakara Manusa Yadnya, Pitra Yadnya, lan Rsi Yadnya.

3.     "Bima Kroda" (uyut kadi Sang Bima ngamuk), kanggen ritatkala upakara Butha Yadnya.

Teknik/tata cara ngagem (memegang) genta ring angganing pamangku matiosan, punika mahawinan patut sering muruk nganggen ageman soang-soang, sampunang nuut-nuutin ageman anak tiosan.

Milihin genta sane becik wenten tata carannyane. Gisiang tangkai gentane, sentil palitnyane apisan, pirengang gaungnyane. Yening gaungnyane dawa/lantang tur maalun, punika genta sane becik. Genta sane pinih becik lan spesial kawastanin genta utter, yening kasuer (digosok) nganggen kayu, gaungnyane ngancan ngerasang manguing tur dawa.

Sang sane makarya genta kabaosang Pande Timbra. Pande Timbra sane becik pakaryannyane wenten ring Banjar Budaga Klungkung. Pangajin genta utter kirang langkung Rp. 1.200.000,-.

Sesampune numbas genta, mangda sida kanggen piranti/sarana pamangku muputang yadnya, genta punika patut kaplaspas lan kapasupati. Ritatkala ngawit nganggen genta, patut genta punika kasuuciang dumun antuk "ngaskara genta". Puput.

Sumber: http://stitidharma.org