CERPEN: ASAH ASIH ASUH

ASAH ASIH ASUH

Pande Kadek Juliana 

*

Petengé ento sepi jampi, kadirasa jangkrik buka ketebin tan wénten pakrik-krik. Gulem nyaputin langit, ngawinang bulan lan bintangé tan sida kacingak saking soring langit. Katak lan dongkang saling pasautin kadi rasa ngajap-ajap mangda Sang Hyang Wisnu digelis medal saking langité, apan jagate sue tuh gaing lahru kangkang sangkaning panes sasih kadasané. Galahé punika sakadi nyarengin metengin keneh Ni Putu Asihé. Mapineh-pineh ipun ring munyin gegélannyané I Gdé Warsawa duk inuni semeng daweg ragané matemu mangkeb-engkeban sareng kalih ring umah dadongné Ni Putu Asih. Satata marawat ring manahnyané pangidih tunangan ipuné lakar ngajak dewekné nyikiang tresna antuk ngarorod.

"Tu, beli mejanji tekén Putu. Lakar satya nindihin tresna. Yadiastun bapan Putuné tusing setuju ngelah mantu cara beli, ulian beli pianakné I Dangin. Sakéwala bes kaliwat sayang beliné jak Putu, buina keneh iragané melah, sing nyandang buin iraga makebangan. Cutetné, buin mani semeng beli lakar ngajak Putu kawin lari. Siagaang ragan Putuné, da suba ngaba apa-apa, beli suba meliang ragan Putuné panganggo. Buin mani antosang bli jumahné Luh Sari badangin, da pesan luh nyambat apa-apa ngajak anak lén. Yan ada anak matakon, orahang bena melali". Asapunika piteketnyané I Gdé Warsawa ring Ni Putu Asih.

Kasujatiané, Putu Asih kantun bimbang antuk pinunas gegélanipun. Kadirasa tan purun gagésoan ngambil kaputusan. Mangdané tan kabaos gangsaran tindak kuangan daya. Ulah-ulah nyemak kaputusan, nanging ngamolihang pikobet ageng. Ni Putu Asih jejeh pisan yan bapan ipuné ngantos brangti. Punika mawinan Putu Asih ngidih témpo ring gegélan ipuné jagi ngambil kaputusan.

Inget Ni Putu Asih ring paglemék dadong ipuné wus I Gde Warsawa ninggal umah dadongné inuni. “Tu.., yan dadi dadong mapiteket jak Putu. Sing ja liu pangidih dadongé, mlahang malu mapineh satondén Putu majalan nuutin pangidih gegélan Putuné. Dadong nawang, nak mula melah sujatiné keneh Putuné ngajak I Gdé ngantén, apa buin cening pada mamindon, apanga sida bapan ceningé buin raket manyama ngajak Bapan I Gdéné yan suba mawarang. Sakéwala Putu suba nawang kénkén gedeg basang bapan Putuné ngajak I Wayan Dangin bapan I Gdé Warsawané. Apang tusing ulian ené dadi biuta gedé saling ngédengang basang bawak”.

Dadi inget Ni Putu Asih ring paundukan biuta maplekara tanahé dumun. Duk bapan ipuné I Nengah Dauh sareng reramannyané joh I Wayan Dangin marebat sangkaning maplekara tanah warisan duké Ni Putu Asih kantun masekolah ring SMP. Ngantos mangkin gedeg bapan ipuné tan ilang-ilang. Yadiastun ké tanahé punika sampun kaadol olih pekak Ni Putu Asihé mangdané nénten wénten karebutin lan jinahné kanggén menahin miwah ngupakarain sanggah kawitannyané ngantos sida bungah kadi mangkin. Wayan Dangin daweg punika sampun ngalegaang tanah warisané punika kaadol yan sayuakti kanggén menahin sanggah kawitané, nanging I Nengah Dauh kantun masih madué keneh brangti ring I Wayan Dangin, mapan ulian ipun tanahé punika tan sida kagarap olih I Nengah Dauh. 

“Aduh... déwa ratu! Dadi kekéné san hidup tiangé ratu betara. Icén ja titiang pamargi becik, mangdane prasida titiang ngajak bli Gdé masikian alakirabi lan reraman titiangé sida mabesikan sareng bapané bli Gdé”. Kadi asapunika Ni Putu Asih masesambatan padidi ritatkala keneh ipuné kapetengan. Yan pinehang, nak jakti méweh kawéntenan Ni Putu Asihé, tan bina i taluh apit batu. Yening ipun nuutin kadi pangidih I Gdé Warsawané jagi ngarorod, sinah pacang nemu temah bapan ipuné. Nanging, yan ipun tan nuutin saking tuas manah ipuné, nak bas kaliwat sayang Ni Wayan Asih ring I GdéWarsawa. Dadosné kadi bimbang manah ipuné nyalanin.

Petengé punika, kadirasa tan polih nang aketélan Ni Putu Asih ngidemang paningalanipuné, inguh, paling, uyang, maguyang ngangkang tan kadi-kadi, ngenehang pajalané durus pacang majalan ngarorod sareng I Gdé Warsawa semengé malih bos-bos. Ujané bales tan gigisang, kadi nyarengin inguh manah Ni Putu Asihé.

“Nah... pang sepalanan, i dewek bani adané ngetohin tresna, nyujuh melah ngadokang jengah kanguang ngalah apang élah, sida bungah, mani puan bayah dosané ngajak yayah rena”. Kadi punika papinehnyané Ni Putu Asih pakrimik ngamigmig padidi ring kamar ipuné.

**

"Kukuruyuk..... kukuruyuk... kukuruyuk...."

Munyin siapé nyihnayang jagaté sampun semeng. Sang Hyang Surya sampun matangi kairingin antuk suaran kedisé manguci saling pasautin ring carang-carang taruné ageng. Sakadi girang pacang nyaksiang lampah Sang Arjuna ngamandung Dewi Subadra antuk titah Sang Kresna. Langité kedas tanpa ambu, nyihnayang dinané melah pacang ngardi pikardi becik.

 "Tu.. bangun Tu.., suba semengan né, barengin malu mémé magarapan di paon. Nto pada gaénang malu i bapa kopi!". Mémén ipuné nundunin Ni Putu Asih nogtog pintun kamarnyané.

"Ngih mé..! Mangkin pun tiang ka paon”. Magébras Ni Putu Asih bangun tur ngojog ka paon marengin mémén ipuné magarapan lan maktaang bapan ipune wédang acangkir wanén.

"Kopiné pa..!"

"Nah.., jang malu ditu di baléné. Bapa nu nyangih arit lakar ka tegalé ngaritang sampiné padang nang acekel". Iteh Pan Dauh nyangih arit ngangén srawad ring dajan menténé.

"Tu.., nyai dingeh bapa di pisaga orahanga pepes kintil-kintil bareng ngajak I Gdé panakné I Dangin, saja? Bapa sing pesan demen yan nyai bareng-bareng ngajak jelemané totonan. Yan nyai nu lega nganggon bapa rerama, johin jlemané ento. Sing suka bapa ngelah mantu panakné I Dangin. Yan sing nu anggon misan jlemané ento, pidan suba kasepeg baongné aji arité ené". Sada bangras bapannyané ngraos.

"Aduh.. pa. Nu dogen bapa gedeg ngajak bapa Dangin! Yan amonto suba i bapa Dangin ngesor tekéning bapa, apanga ngengsapang unduké pidan. Nu masi bapa gdeg?".

"Endepang iban nyainé, apa ketawang? awak raré mara dibi! Cutetné bapa sing suka nepukin nyai paek ngajak panakné I Dangin". Sada ngambrés Pan Dauh mantigang srawad di arepnyané Ni Putu Asih lan majalan ka tegalé.

Ni Putu Asih ngeling sigsigan ngojog ka paon ngelut mémén ipuné. "Nah, da ento anggona sebet Tu, suba tawang Putu i bapa nak kereng bendos. Apa buin yan nyambatang iwak ceningé i bapa Dangin. Mémé anak suba melid masi ngorahin i bapa apanga ngengsapang unduke pidan-pidan. Nanging nu dogen kaduta gedeg basangné i pidan. Suwud monto ngeling, sing dadi ngeling semeng-semengan". Mén Asih sada polos banban nuturin pianak ipuné.

"Jani tulungin mémé meli kajukut tekén bé siap lakar anggon darang nasi! Ka peken malu selidan sambilang maseliahan masi Tu, yan tepuk timpalé di peken liang suba bayun Putuné. Suwud monto ngeling. Né aba pipisé".

"Ngih mé.., tiang pamit mangkin sareng mémé". Mén Asih makesiab mirengang munyin pianaknyané ngorahang mapamit. Mén Asih mapineh ring kayun buka pianak ipuné jagi matilar tan mawali malih. Nanging tan ja kaodar antuk Mén Asih ring pianak ipun.

Ni Putu Asih kadi polih galah né mangkin ngaruruh gegélan ipuné pacang tulus ngarorod dinane semeng punika. "Nah, sedeng melaha iraga oraina ka peken ngajak i mémé. Jani suba panumayan iraga lakar ngalih bli Gdé jumahné Luh Sari. Mémé, bapa ampurayang tiang tan nyidang nuutin keneh bapané apang palas ngajak bli Gdé".

Sawatara jam tengah sia, Ni Putu Asih teked jumahné Luh Sari. Dapetanga I Gdé Warsawa sampun jumenek ngantosang irika. "Adi makelo Tu..? Uli tuni bli ngantosang dini ngajak Luh Sari. Jumah bliné nak suba sayaga makejang. Tuah ngantosang iraga teka dogén. Para prajuru adaté masi suba pada ngantosang. Lan jani mulih beliné!".

"Ampura bli Gdé, tiang telat. Mara kadung tiang nulungin i mémé di paon, buina tiang ngalih selah lakar mai”. Pasaut Ni Putu Asih ring gegélannyané.

Sareng kalih laut mamargi negakin sepeda motor astrea buntut ngojog umahnyané I Gdé Warsawa.

***

Sampun soré galahé, Ni Putu Asih konden masi teka uli peken. Mémé lan bapan ipuné ngibukang raga tan karu-karuan, nyapnyap teken pianakné bajang saking semengan ngantos sanja kondén masi teka.

Malih jebosnyané sagét cicingé ngongkong ring arep pamesuan umahnyané. Sagét rauh anak lingsir makta surat nartayang indik Ni Putu Asih lan I Gdé Warsawa sampun wusan mabiakaonan lan kasaksiang antuk adaté irika. Pan Dauh lan Mén Asih katunasin galah mangda rauh ring rahina bénjang semeng nyaksiang pianak ipuné matataban.

Tan kandugi brangti Pan Dauh mireng gatrané punika. ”Béh.. Sajan pesan jelemané totonan sing bisa ngaleganin rerama nang abedik. Nah yen suba keto, nyai méméné da pesan nyen kemu nelokin pianak alpaka guru totonan, jeg depangin. Sing ja baang kai lakar ngaba tipat bantal nyen mai”.

Ngantos Ni Putu Asih ngelah pianak suba matuwuh nem sasih, enu masi bapan ipuné ngadut gdeg basang, yadiastun Mén Asih ngaraina ngalémekin kurenan ipun, kantun masih Pan Dauh tan mresidayang ngenduhang gdeg basang.

"Bli.., dong inget-ingetang ragané, da ja toliha pianaké, cucuné delokin masi kapah-kapah. Eda gedeg basangé ipidan ngajak Pan Dangin buin lantanganga, pang da pianaké cara jani kena. Masalahé ento suba liwat joh. Buina yan amonto Pan Dangin ngesor ngajak beli, jani ia dadi warang iragané. Miribang ené suba pituduh Widhi, lantaran i cening Asih makurenan ngajak I Gdé Warsawa né lakar mesikang beli ngajak Pan Dangin manyamané apang tulus, apang parus, asah asih asuh. Né cucune buin mani anak maotonan, bli undanga ngajak Pan Dangin apang ngidaang teka nelokin cucuné".

Ditu lantas Pan Dauh mapineh-pineh ring raga. "Béh saja buka munyin kurenané. To ngudiang iraga makelo ngadut basang gedeg ngajak Pan Dangin, buina jani pianaké dadi mantun iané. Saja buka munyin kurenané, miribang Ni Putu Asih pianaké dot apang bapané manyama pada melah saling asah, saling asih, saling asuh. Saling asah ban iraga ngajak Pan Dangin pada-pada tusing maan waris masih ipidan, saling asih ulian pianaké maatepan masomahan, saling asuh ban iraga jani suba ngelah cucu ne patut upapira melah-melah. To ngudyang iraga tua buduh ngurukang ngajain pianaké mamusuh ngajak nyama. Buina cara ngarebutin balung tan paisi".

Ditu lantas Pan Dauh buin maniné ngajak somah ipuné ngarauhin pondok Pan Danginé ngidih pelih ban ngadut gedeg basang bas makelo sambilanga ipun nelokin cucunnyané maotonan.

(Redite paing, 8 Februari 2009)