GALUNGAN LAN KUNINGAN RING RAWAMANGUN

NGAGALUNG  LAN MAKUNINGAN 

RING PURA RAWAMANGUN

ngayab banten galungan

Rasa bagia manah titiange ne mangkin. Napi sane mawinan asapunika? Santukan galahe puniki kantun titiang prasida ngrayaang rahina suci Galungan lan Kuningane (pinanggal, 1 lan 11 Pebruari 2011) sane sampun lintang, yadiastun titiang wenten ring rantauan, i riki ring jagat Batavia utawi Jakarta.  Genah titiange Ngagalung lan Makuningan tan ja tios wantah ring Pura Aditya Jaya Rawamangun.

Genep sampun ping kalih titiang ngrayaang rahina Galungan lan Kuningan i riki, ngawitin titiang nulengek langit Jakartane, saking sasih Masehi  April 2011 ngantos mangkin. Ring genahe puniki, titiang ayat ngaturang bakti, nunas ledang kayun Ida Bhatara-Bhatari sami ring tanah wed lan ring Kawitan. Tan lali taler titiang nunas ica ring Ida Ratu Bhatara-Bhatari malingga-malinggih ring Pura Aditya Jaya Rawamangun, pinaka sang ngaraksa jagate i riki, mangda setata titiang kapicain karahayuan lan kaselametan sekala miwah niskala, naler mangda setata titiang ngamolihang rejeki makarya i riki. Mangda wenten anggen nyambung tuwuh ring marcapada.

Pura Aditya Jaya puniki genahnyane ring jalan Daksinapati Raya No. 10 Rawamangun, Jakarta Timur. Punika mawinan ketah taler karaosang Pura Rawamangun kemanten. Ring wewidangan purane wenten taru bingin sane ageng-ageng kakalih, ring jaba Kaja Kauh asiki lan ring Kelod Kangin asiki. Punika kanggen ciri genah purane irika.  Genah purane dahat asri pisan. Katata antuk asta kosala-kosali sane banget kapingitang. Sakancan anake sane rauh ka pura ayat tangkil, sami ngarasayang liang ring manah ipune. Umpamiang kadi bedake sane polih ketelan toya amertha jati, dahat rumasa tis lan ngangenin pisan. Kadirasa tan kayun budal jadmane sane sampun polih nangkil lan masandekan iriki.

ngayah

Punika taler sane rasayang titiang. Yan sampun titiang polih muspa ka Pura Rawamangun, wusan punika pastika masandekan ring natar purane, ngarasayang teduh hawa spiritual sane wenten irika. Yan sampun kadi punika, jeg tan ja marasa titiang wenten ring Jakarta. Rasa-rasane sampun wenten jumah ring Bali. Niki sampun sane setata ngranayang seneng anake rauh ka purane inucap. Lian ring punika, ri tatkala ida dane ka jaba sisi, ring sisi Kangin purane sampun wenten genah masandekan irika. Wenten bale sumanggen sane ageng, naler wenten bale bengong tatiga, pas pisan genahne ring sisi Kangin taru bingine. Mawinan dahat tis pisan genahe irika.

Daweg punika rahina Kuningan, semengan titiang sampun mamargi saking genah titiange ngekos  ring Kampung Bali Tanah Abang, Jakarta Pusat jagi pedek tangkil ring Pura Rawamangun. Titiang sareng gegelan titiange  majalan  menekin bus ping kalih jagi ka Rawamangun. Kapertama bus Kopaja 502 arah Tanah Abang ke Kampung Melayu, tedun ring Matraman ring sor flyover (jalan layang), ngalantur (transit) ngarereh Bus Metro Mini nomor 46 utawi 49, tedun kantos ring arep Sasana Golf Rawamangun. Mamargi malih akidik ngalerang, sampun tiang neked ring Pura. 


Nembe rahinane puniki titiang mamargi sareng kalih. Biasane wenten malih timpal titiange sane nyarengin, santukan ipun daweg punika sampun matulak ka Bali, dadosne sareng kalih kemanten titiang tangkil. Majalan titiang sambil ngandong tas sane madaging kamen, saput, senteng lan udeng, pirantin titiange malih jebos jagi muspa. 


Sujatine ring pura naler sampun wenten kasediang senteng, asep lan sekar, katur ring para pamedek sane nenten makta piranti muspa. Nanging titiang ngemanahang wenten kirang yening rahina ageng sakadi Kuningan puniki, yening nenten nganggen busana jangkep, napi malih muspa ring pura. Punika mawinan titiang setata makta kamen, saput, senteng lan udeng ri tatkala muspa.  

renovasi ring pura

Rauh irika titiang maseh ring jaba purane, i rika wenten genah para pamedek sane kayun magentos wastra. Laut numbas banten lan canang ring kios banten Baler purane. Daweg punika naler pamuspaan sampun kakawitin ring jeroan purane, titiang polih ring palihan (gelombang) ka tiga dawege punika. Para pamedek krama Hindu sane wenten ring Jakarta akehan rauh mariki tangkil. Sami pada rapi muspa sareng-sareng, para pamedek nenten kangkat matangi yening durung samian polih wangsuh pada. Tatkala nyantos dane Jero Mangku ngaturang wangsuh pada (tirtha), biasanne wenten sang sane madharma wacana. Indik puniki rasayang titiang becik pisan yaning katiru ring Bali. Mangda nenten pamedeke magrudugan wusan nunas tirtha. Turmaning niki pinaka silih tunggil sarana nincapang sradha lan bhakti iraga pinaka umat Hindu.

Daweg punika ring Pura Rawamangun kawentenang renovasi pelinggih, gelung, lan panyengker pura. Yadiastun wenten renovasi, nanging nenten ja ngirangin rasa tulus para kramane ngaturang bhakti ring rahina Galungan lan Kuningan sane sampun lintang, punika naler titiang.  Sami pada liang ngrayaang dina kemenangan dharma lan sornyane adharma.  Mapadu liang iriki titiang sareng sameton Hindu rantaun sane tiosan, saling salamin lan saling pakedek pakenyum. Rasa suksma ngebekin manah mapan sampun sidha titiang ngrayaang Galungan lan Kuningan puniki ring Pura Aditya Jaya Rawamangun.

"Yeehhh saja..... Lali titiang malih akidik, yening sampun wusan muspa sampunang gegeson budal ngih, simpang dumun ring kantin  baler purane, wenten dagang nasi be guling. Jaen pesan, kanggeang anggen ngicalang kangen ring masakan Bali. Wantah Rp. 20.000,- (kalih tali rupiah) aporsi, nenten lali madaging kuah aresnyane, hehehehe... ". Swasti Galungan lan Kuningan ngih.....!!