TRESNA RING LELUHUR

I meme setata apik kin i pianak

Yening maosang utawi mireng kruna "leluhur", iraga pacang kabakta ngerambayang sarwa pitara sane sampun newata, sane sampun malingga-malinggih apik ring sanggah kemulan utawi palinggih "Bhatara Hyang/Hyang Dewa".  Manah iragane sampun kacangkok sakadi asapunika yan maosang indik leluhur iragane soang-soang. Kasujatiane, napike wantah pitara sane sampun newata manten sane kabaos leluhur?

Ida dane patut uning sareng sami. Boya ja nika manten sane kabaos leluhur. Reraman iraga, I Bapa muah I Meme masih kabaos leluhur, I Pekak kalawan I Dadong masih leluhur, kanti pianak lan cucu naler kabaos leluhur. Napi sane mahawinan pianak cucu naler kabaos leluhur? Boya ja leluhur nika nganut lintih saking duur? Dados ring sor iraga kabaosang leluhur taler?

Patut iraga eling indik punarbawa. Kelahiran kembali sang hyang atma ring marcapada. Pianak lan cucu iragane wantah tumitisan utawi panumadian para leluhur iragane sane sampun-sampun. Sane durung prasida amor ring Acintya, malih ngmargiang samsara iriki ring marcapada. Punika mahawinan yaning iraga urati ring pianak lan cucu, pateh ring nguratiang leluhur ngicenin pamargi sane becik. Yen sampun melah ban miara lan nresnain i pianak lan cucu sinah taler becik panadosne i pianak sareng i cucu turmaning taler becik pacang karman iragane bin  pidan.

i meme lan pianakne tempoe doeloe

Maosang leluhur, jakti raket pisan ring kawentenan silsilah kulawarga. Punika mahawinan patut iraga bakti lan tresna ring leluhur, tan dados tulah utawi engsap, mangda nenten benjang pungkur keni kaponggoran utawi alpaka.

Indik tresna ring leluhur, boya ja majalaran antuk ngabenang lan mrorasang kantos nelasang prebia mageng. Ngelingin ri tatkala i rerama ngalahin, boya nika tresna utama iraga ring leluhur. Yening wenten raos ring margi ngaku-ngaku ulian ngabenang lan ngelingin reramane ngaku dewek paling tresna lan bakti tekening leluhur, sampunang guguna. Mapan boya asapunika caran iragane nresnain lan maktinin leluhur.

Yening iraga ngaku tresna ngaku bakti, di nu hidupne patut iraga bakti kin irerama, i kaki lan i dadong, patut bliang bubuh sebilang semengan, ajak ngorta. Ento ane ngae liang irerama ane madan tresna lan bakti. Len kin to, nyayangang pianak cucu, mendidik apang dadi jadma maguna riwekas, taler kabaosang jalaran nresnain leluhur.

Yan suba keto baan ngupapira di nu hidupne, sinah kayang matine tan ja pacang irerama nagih pang abenanga aji prabia gede. Pastika liang, dangan pemargi sang pitara yan suba dugase nu hidup iraga nyaga melah-melah. (jul_pande)