RAHINA KUNINGAN SUTHA ABIMANYU MATEMU RARE ANGON NAKBALIBELOG

Rahinane mangkin Saniscara Kliwon Wuku Kuningan sane ketah kasambat Rahina Suci Kuningan. Pinaka rentetan rahina suci Galungan. Kuningane puniki, pinanggal kutus (8) ring sasih masehi September warsa kalih tali roras (2012) titiang Admin Sutha Abimanyu ngrayaang ring Jakarta, kadi nem sasih sane sampun lintang. Sakemaon daweg Galungane titiang ngrayaang ring Bali, santukan polih cuti tigang rahina ninggal pekaryan ring Jakarta (Aget maan mulih Galungan! Ngalih be celeng jumah... hehehe..!!)

Sekadi nem sasih lintang, titiang katimpalin antuk kinasih ngaturang pangubakti Kuningan nyujuh manah ning mangda sadar tur uning ring Pura Aditya Jaya Rawamangun, Jakarta Timur. Saking semeng ngantos sore titiang irika nelasang galah ngecapin ening pikayun ring rahina Kuningane puniki. Sambil macanda malila-cita sareng sameton Hindu lan timpal-timpal sane sampun nyantosangg irika. Nyobyahang indik legan manah sida makuningan ring pura. Tan lali taler tiang sareng gegelan titiange macanda sareng asu-asu sane wenten irika, Siro, Jhon, Dogy lan Snowy (Aeng2 gati adan cicinge ne puk! hihihi..).

Tatkala galah sore, titiang sampun ngarencanayang pacang pedek tangkil ring Pura Dalem lan Prajapati Purnajati Tanjung Puri, Cilincing, Jakarta Utara,  mapan rahina Kuningan puniki piodalan ring genahe inucap. Sampun taler titiang sareng kinasih madabdaban pacang sareng pedek tangkil merika sambilang ngayah ngiring pakuluh saking Pura Aditya Jaya Rawamangun. Galah nem sore sampun sami sayaga pacang lunga. Sambilang titiang masih ngayah nabuh (kangguang nyengceng, wak sing bisa ne lenan..!! hihihi.. yang penting ngayah..! cocok?).

Rauh ring Pura Dalem lan Prajapati Purnajati Tanjung Puri, Cilincing, angob yukti titiang ngatonang kahanan plaba lan wewangunan Purane, kawewehin antuk temblagan jadma Umat Hindune makeh. Kahanan purane maundagan manut plaba nyane, wewangunannyane anyar, nganggen bias malilo tur madaging gecek-gecek alus tangan sangging si tukang ukir. Yadiastun durung sami wewangunane puput, nanging sampun sinah keasrian genah inucap. (Ten prasida ngomong "rrrr.." tiang drika, seken2 sing kalah jak pura di Bali).

Umat Hindu sajebag Jakarta rauh pedek tangkil, mapan pura inucap wantah tunggil Kayangan Tiga iriki ring Jakarta. Saking nistaning mandala, madyaning mandala lan utamaning mandala katah para janane pedek tangkil ngaturang pangubakti. Tan sida antuk titiang ngarerambang antuk akeh para Umat Hindune sane pedek tangkil. (Titiang dawege inuni polih galah muspa ring sesion ping kalih. Ngantre dumun... ten dados maseluk..!! (^_^)

Nahh... ane ngawe liang manahe malih, ulian pada-pada ngiringang pakuluh, akhirne ketemu masih Sutha Abimanyu ngajak Bli Rare Angon Nakbalibelog ring Pura Dalem Purnajati. Pas matemu ring Utamaning Mandala pura (ring ajeng, dane negak di duri, tiang ring arep). Patemone punika mawit saking status ring FB-nyane Bli Rare Angon Nakbalibelog, titiang prasida kontek-kontekan lan coment-comenan ngalantur smsan, jegjeg cutet pang maan kacunduk galahe punika. 

Mihhhh......!!! Akhirne tepuk masih, uling makelone kenal, mawit saking www.gitabali.com (radio streming nak Bali - DJ Eben), ngantos kacunduk ring Bloger, Facebook (paras buku), twitter, msl. Mihh... bagus genjing bli Rare Angon Nakbalibelog ternyata, misi jenggot, basangne gede dik, hihihi... maan mafoto kwala fotone Bli Rare Angon Nakbalibelog sane makta, dadosne tan prasida unggah titiang iriki mangkin, nyantos tag-an dumun. Hehehehe..!!

Polih jeprat-jepret lan matutur-tuturan ajebes, santukan pamuspan sampun puput lan pamedek sane pacang ayat tangkil kantun akeh ngantre, puputang patemone ring Utamaning mandala pura. Samian para pangayahe katur rauh ring suci, nunas paica (duk acange.. nunas malu). Nahhh.. mapan tiang nenten uning genah pawaregan irika, bingung titiang ring dija macelep pacang nunas. Jegjeg sampun saking sih panuntunan Ida sasuhunan irika, teked batis tiange matindakan ring genah para pamangkune nunas. Jeg sampun sing kene sing keto, irika titiang sareng-sareng nunas. hehehehe...! ye wusan nunas sareng pamangkune, jeg ye sinah genahh pawaregane. Men sampuun wusan titiang nunas toh, wastu galang panyingake. HiHiHi...!!

Wusan nunas, ne mangkin sampun kawastanin basange wareggggg.....!! malih matindakan titiang ring jaba pisan, genah wantilan purane. Irika wenten balih-balihan. Manah nonton, maseluk irika, malih tiang katemu sareng Bli Rare Angon Nakbalibelog, malih polih titiang ngebun ajebos kantos dane mapamit dumunan, santukan dados seksi transportasi pangiring saking Cileduk. Nah amunika patemon titiange sareng Bli Rare Angon Nakbalibelog ring galah Kuningane iwawu. Dumogi ja antuk swecan ida Hyang maraga Niskala, prasida malih titiang kacunduk sareng dane. 

Titiang sareng kinasih lan para rombongan saking pura Rawamangun kantun polih galah nonton ilen-ilen ring wantilan, sambil macanda sareng asu-asu sane wenten irika (jeg mokoh-mokoh san cicinge dini puk..! hehe..). Nah, mapan sampun galah taler, titiang matulak, mapamit taler sareng rombongan jagi ngiring Ida Sasuhunan ring Pura Aditya Jaya Rawamangun budal. 

Santukan foto sampun kasobyahang (di tag) antuk Bli Rare Angon Nakbalibelog, mangkin share titiang patemone galahe inucap. klik...!!

-puput-