I Ketut Ruma, asapunika lumrah para janane nyengguh. Sastrawan Bali sane mawit saking Desa Jasri, Karangasem puniki sampun saking sue nelebin kasusastraan Bali, utamannyane seni lan budaya matembang "Geguritan". Saking ngripta, nedun lan nyurat geguritan. Makeh sampun cakepan Geguritan sane kamedalang. Yening ida dane ngarereh cakepan geguritan ring toko buku, sinah sampun akeh nyingakin buku-buku pakaryan dane.
Anak lanang polos, nenten akeh raos lan madue agudang karya lan prestasi. Yadistun yusa sampun lampus, nanging kantun oneng ngalestariang seni lan budaya Bali utamannyane seni geguritan sane arang pisan ring aab jagate mangkin kasenengin antuk para anome. Dane taler sibuk ngarahina pinaka pembina lan ngawentuk sekaa santi ring wewidangannyane.
Yening wenten pacentokan mawirama utawi macepat ring wewidangan Karangasem, dane sering pisan kasudi pinaka Tim Juri. Nenten ja ring seni mageguritan manten, taler ring seni nyurat aksara Bali. Makeh sampun dane nedunn lan nyurat lontar-lontar Bali sane kasimpen ring pondoknyane. Sang sapa sira arsa jagi nyingakin lan mesen lontar, dados rauh ring pondok dane ring Desa Jasri Karangasem.
Pikobete mangkin, Sang sapa sira pacang ngalanturang napi sane kekaryanin lan kalestariang antuk dane riwekas? Yen sing i raga, nyen buin?!
No comments:
Post a Comment
Wusan simpang, elingang komentarnyane ngih..! Ring colom FB ring sor taler dados. ^_^ sharing geguratane ring ajeng dados taler.