Arya Tutuan

Nah, ada tuturan satua pecak Ida Dalem Buru sané nurunang. Awinan maparab keto mapan karyan idané maboros ka alasé. Sadina-dina ida maboros di alasé. Nuju dina anu, disampuné mamargi tan polih napi, aukud tan maan napi kanti sanja. Ida majalan kema mai, panggihina anak alit di betén punyan biuné. Suba kéto kaduduk anaké alit tur kaparab I Berit Kuning. Nika duduka ambila baktana ka purin Idané.

Ring puri sampun ida madué oka. Okané punika semetonanga utawi panyamaanga. Lantas kaukina rabiné. "Adi jegeg, né beli maan nuduk anak cerik di alasé, di puri masih ada i cening. Nah bareng dini ajak beneh-benehang ajak penyamané olah-olahang". Pengertian rabiné olah nika ébat. Duk rabin idané lunga ka alasé maboros, anak alit punika ngulgul, nakal di puri lantas olaha/ébata anaké alit punika. Lantas wadahina paso janga di piasan mawadah dulang tekepina aji saab.

Rauh lantas Ida Dalem Buru. Duwaning  lebihan  tresnané tekéning okané sané duduka punika, wawu neked suba takonanga. "Ija anaké alit?", kéntenanga rabiné. "Drika napi di Merajan". Ojoga ka mrajan kadéna maplalianan anaké alit. Kipak-kipek ten panggihina anaké alit di Merajan. “Adi sing ada i cening di Merajan, dija ye né?”. Lantas panggihina pasoné ring piasan, ungkabanga saabé. “Adi ada lawar, bé apa ne adi?”. Masaut Duagung Istri, “Toh beli ngorin tuni olah-olahang, niki sampun olah-olahang tiang”. Jeg brangti Ida Dalem, mapan rabiné salah tarka ngamatiang anak alit, kasaup rabiné antuk para pepatihé. Abana ke alasé.

Né mangkin, okané sané malih siki mekelo nakonang biangné. Tan uning ring kawéntenan biangné mapan saking alit katinggal di alasé ngemargiang hukuman.  Ngedil anaké alit matakén ring ajiné, tan polih pasaut patut saking ajiné, lantas ngambul anaké alit. "Aji, yén aji sekadi asapunika tiang jagi ngalih-alihin ija ya i biang jani". Mireng asapunika okan idané , engsek manah Ida Dalem. "Nah ngoyong malu cening, yan alih sujatiné biang ceningé anak ia pelih. Pelih sing buin aji ngitungin mabiyang, masomah. Biang idewané suba jang aji di alasé. Ditu ye ngaé pondok".

"Nah men kénten aji, tiang perlu masih mapenauran tekén biang tiangé".

"Nah cening dogén ba kemu, sakéwala cening sing pesan dadi nyumbah biang ceningé, mapan biang ceningé suba kakutang ulian pelih malaksana pidan, yan kanti cening nyembah, sosod keagungan ceningé". Lantas ida madadauhan  ngaukin para prajurit jaga ngiringang okané ka alasé. Duaning cara pidané yan mamendak ngaba gong, keplug-keplugan.

Apan biangné marasa tekéning pelih. Nyeh, takut wénten anak ngarereh, wiréh ramé pirenga lantas malaib. Ramé munyin bedilané, kadéne kal nyédang ragané nénten uningina okané sané rauh madedauhan kauk-kauk. Terus masih Ida biang malaib pati kaplug ngantos ulung ka séméré. Jagjagina tekén putrané, ten tepukina napi sampun ulung ka séméré. Irika lantas okané nyumbah, "Biyang tiang nyumbah biyang pang melah pejalan biangé". Engsap tekéning pabesen ajiné, wus punika mara suwud nyumbah ring séméré sagétan ada punyan timbul mentik tegeh gedé pisan. Madaging kedis selem mata barak makeber mamunyi: “tuu... tuu...tuu...tuu”. Nah sekaté ento anaké alit kapastu lan kasengguh Tutuan. Anaké alit punika maparab Arya Timbul.

NB: kasatwayang olih Pekak Padang, Dawan-Klungkung.