Sing move on, kéto rasang admin anaké matoh di Pilkada DKI. Uli tanggal siangolas, jani suba tanggal nemlikur, nu masih ada sing terima lan sing medayanin I Ahok kalah di Pilkada DKI Jakarta.
Apa kranané admin ngorang kéto? Utamané informasi masuk nto uling serana ané paling sai bakat urik aji dogol limané, hp! Di sosial media ajak portal berita online nu doén naké sing med-med ngitungang I Ahok kalah. Sing ja jelema di Jakarta doén ibuk, kanti di sisin Jakartané bareng éwa.
Ada ané nemah temah, ada né merarakang kéléngné bilang wai di facebook. Aduh, move on Yan! Mekita ngorin kéto, tapi takut masih admin, nen gedeganga jak brayané di facebook sing ngelah timpal ajak melike-likekan muah komen-komenan nyen. Hehehe.
Ané lucuné sing kéto, ulian Ahok kalah di DKI, ada né iseng-iseng ngorin Ahok dadi gubernur di tongos lénan. Ulian ngefans ajak I Ahok. Nénénan suba makada ramé buin sosmedé, ada ngaé tagar #Ahok4Bali1 apa nto. Aduh, nak Bali setres bareng ulian Pilkada Jakarta. Iraga di Bali gumi landuh, gemah ripah lohjinawi nak ba sing perlu I Ahok. Ahok nto jlama khusus aggon ngatur tongos ne ruet model Jakarta, pang tertata, yén ango di Bali sing cocok. Adi kéto? Yéh, Bali nto nak gumi luih, gumi landuh, adat budaya lan agamané nunggal. Patut tuah putra/putri Bali ané mimpin, ané suba nawang karakteristik Bali nto kénkén! Sing ja ulah-aluh ngejang jelema di Bali. Pemimpin Bali patut lekad, idup, mati di Bali. Amen sing kéto, iya sing ja kar nawang kénkén spesialné Bali nto. Jeg pang danan ja! Amen anak sing ngerti kénkén Bali nto sujatiné, terus baang mimpin Bali, jeg kar benyah lidekanga. Nto jani tolih.. Pasih nagih uruga. Bilang dangka, jalané uyakina mini market kanti ka désa-désa. Apa akibat sosialné tumbuh? Pekenan di Desa suba MPP jani, Mati Pelan-Pelan. Toko-toko cenik muah warung lan penggak ngancan ngaliunang suba matutup lan gulung tikar. Ulian arus Pariwisaté kebablasan, kanti Pura jani suba dadi barang komersil. Aruh..!! Baang Bali nak Bali né mimpin. Ané lekad, idup, lan matiné di Bali. Da gebuh bibihé misi ngorin nak ka Bali!
Suud benya baperan ulian jagoné kalah di ibu kota. Masih benya sing ada kontribusi apa ditu! Da bes joh matolihan, né paek tongos iragané ngoyong, 2018 anak Pilkada, lan jani pilih-pilah calon nak Bali ne melah, anggon mimpin Bali apang Bungah, Taksu Baliné apang ngancan masinar. Kéto doén.
No comments:
Post a Comment
Wusan simpang, elingang komentarnyane ngih..! Ring colom FB ring sor taler dados. ^_^ sharing geguratane ring ajeng dados taler.