PIDATO PERPISAHAN SISYA RING SMP

SAMBRAMA WACANA SISYA KELAS VIII

RING ACARA PERPISAHAN KELAS IX SMPN 2 KUTA

Om Swastyastu,

Sané banget baktinin titiang :

1.      Kaping ajeng Bapak Kepala Sekolah;

2.      Bapak Ibu Guru sinamian sané stata lédang mapaica pawarah-warah lan panuntunan;

3.      Bapak lan Ibu Staf TU sané naler baktinin titiang;

4.      Miwah para pasawitran titiangé sareng sami, sané banget tresna sihin titiang.

Sadurung titiang matur amatra. Lugrayang titiang pinaka angga sané nylewedi dados duta saking kelas VII, ring galahé mangkin, nyihnayang rasa pangayu bagia majeng ring Ida Sang Hyang Widhi Wasa, mapan sangkaning asung kerta wara nugrahan Ida, iraga sareng sami iriki prasida mapupul masikian nglaksanayang acara Perpisahan Sisya Kelas IX SMPN 2 Kuta ring rahinané mangkin.

Ida dané sareng sami, rasa gargita pisan manah titiang santukan nyingakin sajebag kulawarga sekolah sumuyub salunglung-sabayantaka, sapunika taler para sisya kelas IX prasida pakedék-pakenyung pacang nyantosang kalulusan sané pacang rawuh. Pangaptin titiang, dumadak ri kala rahina kalulusan sané pacang rauh, para Bli lan Mbok sisya kelas IX sami nénten nyarengin budaya sané kaon sakadi corat-corét lan kompoi gruang-gruéng ring marginé. Mangda acara kelulusan druéné kamargiang antuk ngaturang sembah pangubakti iriki ring sekolah. Dumogi ja antuk asung kerta wara nugrahan Ida Bhatari Saraswati, bhataraning sang maraga Brahmancari, sakadi titiang lan para sawitra sareng sami, para Bli lan Mbok ring kelas IX prasida lulus 100% ring UN (Ujian Nasional) sané lintang.

Ida dané sareng sami manawita sampun uning nyabran a warsa pastika sampun iraga nglaksanayang acara sakadi mangkiné, pinaka galah matemu wirasa kaping ungkur para sisya kelas IX ring Guru miwah pasawitra ring kelas VII miwah VIII. Pinaka ciri  Bli lan Mbok ring kelas IX pacang ninggal sekolah puniki, nyujuh sekolah sané salanturnyané inggih punika SMA utawi SMK.

Ri tatkala Bli lan Mbok sampun lulus lan ngaranjing ring SMA, élingang pisan sampunang lali ring sekolah SMP 2 Kuta puniki. Santukan tigang warsa ngaranjing iriki pastika wénten ayuta kenangan sané tan prasida antuk ngalaliang. Sedih-Seneng, Sebet-Bagia sareng sawitra lan guru pastika pacang ngangenin. 

Ainggih, ida dané sareng sami sané dahat wangiang titiang. Titiang saking saking duta kelas VII nénten ja panjang atur, wantah asapunika sané prasida unggahang titiang ring panyembrama titiang puniki. Pinaka wasananing atur, titiang saking kelas VII nunas pangampura antuk sapangiwang titiang matur lan nyarengin salami awarsa puniki, mugi-mugi ida dané ngalédangin.

Om Çanti, Çanti, Çanti Om.

(pandejul)