Jro, Jani Nak Ngelawang Matarif!

Suba biasa, asal nuju rainan Galungan buka kéné, nepak raina Umanis Galungan a.k.a. Wrespati Umanis Wuku Dunggulan neked ka umanis Kuningan, dasa lemeng nyejer, jeg ramé suba di jalané ada nak ngelawang. Ané ngelawang, uli cenik-cenik nganti ka truna bajang tua. Uli barong peplalianan mabarung gong malakar séng, nganteg barong sesuhunan mabarungan magambelan temaga majatu baja. Uli tepakan ngeréngséng kanti ngempur padet tekek.

Ngelawang, tuah suba dadi tradisi lan budayan iraga nuju nganem sasih. Tetujoné melah, ngulah sahananing mala, papa klesa dijagaté. Sahananing grubug, gering, desti malaib, jejeh tekén anak ngelawang. Nyanan bisa sarap barong, nyeh naké ngaliak jitne caplok barong bangkung. Apang rerainané tertib aman sekala niskala, penting mula ada nak ngelawang.

Lén kin to, nak né tuah wadah berekspresi nik-nik iragané masih. Angona tongos saling ngalih timpal, malajah ngatur timpal, dadi pemimpin, ngatur pipis asil nglawang pang nyak adil, muah ne lénan.

Ah, nto jani naké nglawang nak tuah Ngamén!! Kéto cara jani nak éwér misi saklek sada mocé mapi paling mangkanana manyambatang.

"Barong ngamén ngamain kantong né!" Béh jeg mudah ja ajianga tradisin né pedidi. Nah, kwala kudyang men? Kéto ya koné, kéto! Da ento tungkasina, apang da benyah jak makejang. Pang da dadi uyut, nak nglah wiweka, nglah pendapat mabinayan.

Ulian kreatif nik-niké mengcover ngelawang ené, dingeh orta ada kanti naké ngaé pakét upahan nak maigelan nuju ngelawang. Mih pakétné tawah gati. Mirib ulian ené ada nak nyambat Ngelawang ento suba dadi barang komersil. Apa saja seken kéto, apa tuah tutur bebanyolan di jalan.

Kéné nto contoh pakétné :
1. Pakét I, Sawéntena : 10 Tali, Papangan makpak ikut alingsehan.
2. Pakét II, 15 tali misi kerauhan.
3. Pakét III, 25 tali pyah, medaging ngunying + ngajeng siap KFC..
4. Pakét IV, 50 tali komplit plus jungklang-jungkling ngosok punyan kayu.

Hahaha.... Mla baud né nglah gaé né. Misi pakét ngunying makpak siap KFC pada. Sakit grieng!!

Kendari, PKJ/11/4/17