Ngajiang Raga Bisaang Awake Ngalih Tongos Negak

Blijul: lan, nunas ica ring Ida Bhatara

Om Swastyastu, De! Da uyut, lek atine. Ingetang tutur tua-tuane, da ngaden awak bisa. Depang anake ngadanin. Da benya ngalih pengakuan dini, lamun benya sing dihargai. Kelidin tongose ento De! Nu liu tongos ane lakar ngajiang kabisaan benya dadi jelema. Lamun di tongose ene cai ngemaksaang raga apang ajianga, da ngarep De! Nak suba ye sing demen ajak cai, apa tuturang cai beneh, nak anggapa pelih kin iya. Apa mawinan? Apan iya suba kapetengan, baan gedegne ajak cai. Kaliput dening matsarya lan awidya. Tau cai ento? Iriati lan kabelogan! Asal jelema iri, buin misi brangtia, sing ada ane madan kabijaksanaan ditu. Sing maukur umur ane keto nyan, De. Biar Tua, liu jelema tua di yusa, cenik di pepineh. Ne kene da ngugu umur. 

Melid suba Bapak ngorain cai De. Lamun cai be nyalian, da benya ngelangi di pasih. Sing habitat benya to, sing tongos idup benya ento! Kangoang di telagane lakun ngelangi, di kayoane, di tukade, di jelinjinge lakun. Pasih ento nak tongos ulam agung, baang iya ne nganggep awakne ulam agung doen ngelangi ditu. Johang awake De, johang awake! 

Kaden cai suba nawang ilmu, suba malajah kanti sarjana. Beneh cai liu pengalaman, liu nawang sastra, liu nawang tutur. Melahang ngalih tongos negak, alih tongose ane leh, ane kedas. Da negak di endute, da negak di buke, da masih demen negakin gedebong. Iba pelih ngejang jit, belus payu, daki payu. Sangkal Bapa ngingetin cai. Bergaul benya di tongos ane ngajiang benya dadi jelema, ane memanusiakan manusia. Sing ja ngaden benya beburon, kacung, jongos, keset jekjekan batis. Usak otake, usak kenehe lamun terus cai maksaang iba ada ditu. 

Mu nak, alihang tongos ibane negak ane luungan. Ane pisaga sampinge ngajiang benya dadi jelema, ane ngajiang lan nganggo kabisaan benya idup. 

Kendari, 06/09/2023

Blijul Pande