SIRA KE I GURU?

"Saking tuhu manah guru, Mituturin cening jani, Kaluih luir sanjata, Né dadi prabotang sai, Kaanggén ngaruruh merta, Saenun ceningé urip".

Tembang sekar alit, Pupuh Ginanti puniki sering pisan katembangang antuk para lingsir ri tatkala mapitutur majeng ring alit-alit muah anom-anomnyané. Mapitutur malarapan antuk tembang utawi gita, mangda sida sang mirengang ngaresep antuk tutur, lan prasida ring sehananing kauripan ngamargiang swadharmaning laku manut uger. Kabaosang ring tembang sekar alité punika I Guru sané mapitutur. Né mangkin wénten lantas pitakén para alit-alité, "Dados I Guru sané mapitutur? Nyén I Guru ento?"

Ngiring cingakin bait kapertama lan pingkalih Pupuh Ginantiné ring arep sané maosang indik Guru pinaka sang sané mapaica tutur. "Saking tuhu manah guru, mituturin cening jani." Kasuksmannyané, sangkaning tulus manah ipun I Guru, mituturin, mapiteket tekéning para alit-alit, anom-anom makesami. Melah tutur I Guru satmaka jalaran sepat siku-siku sané patut tuutin nyujuh genah lan tatujon sané becik. Melah tutur I Guru taler satmaka titi pangancan, genah iraga magisian apang tusing obah ngamarginin sepat siku-siku (jalan sané becik pinaka arah utawi tatujon idup) inucap. 

Nah né mangkin, kasujatianné, sira ké I Guru punika, sané ngicénin pitutur?

Guru punika ring kecaping sastra lan agama ketah wénten petang soroh, sané kawastanin Catur Guru. Catur ngaran patpat, guru ngaran sang maraga luih sané patut ka kagugu lan katiru pinaka panuntun idup. Dadosné patpat wénten guru sané patut baktinin lan wangiang ajak makejang. Kapatpat Guruné punika tan ja tios wantah: Guru Rupaka, Guru Pengajian, Guru Wisésa, lan Guru Swadyaya. 

Ané kapertama, Guru Rupaka utawi ketah kabaos Guru Réka. Sapa sira punika? I Rerama (I Bapa lan I Mémé) sané ngarupaka, sané ngalekadang, ngardi i raga di marcapada, nika sané kabaosang Guru Rupaka. Guru sané miara i raga kanti kelih, truna-bajang, ngasukang ka sekolah lan guru sané paling akéh ngicénin panuntunan idup tekening iraga. Punika mawinan, patut iraga bakti ring i rerama, sasidan-sidan baan mautsaha apang nyidang ngaenang i rerama liang lan bangga tekén i raga. Da pesan kanti ngaénang i rerama gedeg, sedih, sebet, apa buin nengkikin ngalawan tutur rerama, ento kabaos alpaka guru rupaka, gedé pesan dosané. 

Ping kalih Guru Pangajian. Ngarangsuk yusa sampun masekolah, i raga nyumunin makenalan sareng guru-guru sané wénten ring sekolah. Guru sané ngajahin i raga mamaca, nulis, ngitung, ilmu sosial, ilmu alam lan sané tiosan tatkala ring sekolah punika sampun sané kabaos Guru Pangajian. Patut taler iraga bakti ring guru puniki, mapan iraga kadidik mangda prasida dados jadma sané sujati.

Guru Wisésa wénten ring kecaping katiga. I raga idup ring panegara Kesatuan Republik Indonesia, madué sistem pemerintahan sané kanggén ngamargiang roda pemerintahan. Sang maraga pemerintah utawi niti praja puniki sané kasengguh Guru Wisésa. Iraga pinaka angganing para jana, patut bakti lan sareng-sareng nunjangin sang niti praja ngamargiang swadharmannyané, mangda prasida dados Guru Wisésa sané bébas saking korupsi, sekadi mangkiné.

Kaping untat, sané kaping pat Guru Swadyaya, inggih punika Ida Sang Hyang Widhi Wasa, sang sané ngardi jagat, bhuana agung lan bhuana alit. Sakancan daging jagaté puniki wantah pikardin Ida. Yéning nénten wénten Ida, jagat lan sadagingné taler nénten wénten. Punika mawinan patut iraga setata bhakti lan éling, ngaturang yadnya, nunas ica, nunas kaslametan, pinaka suksmaning manah iraga kapicain urip. (pandejul)