PIDARTA RING SAJERONING NYANGGRA RAHINA SARASWATI (1)

Om Swastyastu, rasa angayu bagia pisan manah titiange ri tepengan mangkin (Wrespati, 8/3/2012), ri tatkala titiang iseng searching ring pekak google, wénten titiang nyingakin situs blog: www.pidatobahasabali.blogspot.com, sané sampun malejit daweg bulan Agustus 2009. Blog puniki kantenang titiang madaging éntri/tulisan wantah asiki (madaging tigang pidarta mabasa Bali), sané ka posting daweg Agustus 2009 naler.

Sang blogger puniki nénten prasida tatas panggihin titiang, mapan durung jangkep dané nagingin profilnyané. Ring profil mungguh dané sang blogger mawit saking Banjar Tegal, Darmasaba, Badung.  Reragragan dané makarya blog puniki gumanti becik pisan yéning selehin titiang, pateh pangaptin ipuné sareng titiang lan sameton Bali tiosan, mangda sida ngajegang basa lan sastra Baliné, napi malih dané sang blogger puniki manut data profilnyané madué minat "ingin menjadi penulis yang hebat". Nanging lacur, saking warsa 2009 kantos mangkin (2012) blog punika nénten kalanturang, minab dané ten prasida nglanturang sangkaning pikobet ring anggannyané.

Parab  dané sang bloggeer puniki wawu uningin titiang wus ngawacén pamabah tulisannyané. Dané maparab "Boim Winatha". Yening selehin saking atur pangaksamannyané, dané nganggén basa Bali sané gumanti sampun becik pisan, gumanti dané waged pisan indik masor-singgih basa. Ring sor puniki "atur pikéling" dané sang blogger:

"Pangaksama ngulun majeng Hyang Guruning Sastra. Om Swastyastu, pangayu bagia aturang titiang majeng ring Ida Sang Hyang Widhi Wasa, sangkaning sih asung kerta wara nugraha ida titiang prasida ngawedarang daging pikayunan, jagi mautsaha ngalestariang basa pingkalih sastra Bali druwene majalaran antuk blog puniki. Boya sangkaning manah langana titiang ngaturang conto pidarta puniki majeng ring ida dané sareng sami, nanging sangkaning meled manah titiang ngatonang basa kalih sastra Bali kantun ajeg ngantos riwekasan. Wantah asapunika, titiang Boim Winatha ngalungsur pangampura antuk kekirangan daging conto-conto pidarta ring blog puniki. Om Çanti, Çanti, Çanti Om".

Madasar antuk kawéntenané punika, mangkin aturang titiang daging tulisan sané wénten ring blog pidatobahasabali.blogspot.com ring blog Sutha Abimanyu antuk olahan (éditan) titiangé akidik, mangda lebih maknyuss.. ^_^, turmaning danganan ida dané ngawacén. Dumogi nénten ngicalang rasa lan prasida mapikenoh ring ida dané para pamilet sinamian. Indik hak cipta conto pidarta puniki, boya tanggung jawab titiang, napiké Boim Winatha copas duén anak tiosan, nyalin saking buku, utawi reragragannyané néwék, dané sané uning, mapan ring blog inucap nenten mungguh sumber utawi literaturnyané. Mangda nénten panjang atur, ngiring piarsayang sareng-sareng, dumogi ngalédangin.

Cékidot ngih,,,,,, (^_^)!

(1) PIDARTA RING SAJERONING NYANGGRA RAHINA SARASWATI

Om Swastyastu,

Inggih ida dané sareng sami sané kusumayang titiang, titiang rumasa bagia pisan riantukan prasida masadu arep sareng ida dané i riki. Ring rahina puniki, sané kabaosang pinaka pujawali Sang Hyang Aji Saraswati. Sadurungnyané ngiring sareng-sareng nyihnayang rasa pangayu bagia majeng ring Ida Hyang Parama Kawi sangkaning sih asung kerta wara nugrahan Ida, titiang pingkalih ida dané ngamangguhang karahajengan.

Ida dané sareng sami, umpamiang waluya nasikin segara titiang purun ngadeg i riki ringg ajeng ida dané, jagi nguningayang suksman Rahina Saraswati, sané minabang titiang ida dané sami sampun tatas uning. Nanging, sangkaning meled manah, titiang malih ngaturang majeng ring ida dané sami pinaka pangéling-éling.

Yéning inargamayang titiang Ida Sang Hyang Widhi marupa Surya, madué sinar, sinar punika sané marupa lambang Sang Hyang Aji Saraswati, sané nyinarin jagaté makasami, mangdané prasida ngamolihang kalanduhan miwah karahayuan. Sapunika taler kawruhané punika marupa sinar ring i manusa mangdané uning ngunadikayang sané patut kalawaning tan patut. Iraga sareng sami patut ngaturang pangayu bagia majeng ring Ida Sang Hyang Saraswati, santukan Ida sané ngicénin karahayuan, kawicaksanan, kawibawan, miwah sakancan kawruhané sané katiba ring i manusa majalaran antuk sastra.

Ida dané sané kusumayang titiang, manawita ida dané sareng sami sampun uning, Rahina Saraswati punika rauhnyane ngenem sasih apisan, inggih punika ri kala Saniscara Umanis Watugunung. Kawéntenan pralambang ring sajeroning palawatan Ida Sang Hyng Aji saraswati, sané makeh madaging simbul lan artosnyané soang-soang, titiang jagi mautsaha nlatarang manut napi sané kauningin titiang. Ring lambang Saraswati punika kawéntenan Ida marupa anak istri ayu, madué tangan patpat, ida nglinggihin angsa, taler magenah ring luhuring tunjung. Mangkin jagi uningayang titiang siki ping siki :

1. Sané kapertama, Ida rabin Bhatara Brahma tur maraga ayu sané pinaka simbol prabawan sané ageng, taler pangwruhan punika ngulangunin manah sang sapasira sané satya malajahin.
2. Ida matangan patpat sané soang-soang ngamel genitri, lontar, rebab, lan sekar tunjung. Genitri pinaka simbul pangweruhan punika tanpa wates, lontar pinaka simbul kawruhan, rebab pinaka simbul kebudayaan tur masuara ngulangunin nyihnayang pangwruhan punika ngulangunin, tunjung sekar maha suci pinaka lambang pangweruhan punika suci.
3. Angsa pinaka praciri buron sané wicaksana, sané nyihnayang  yaning sampun wikan, sinah i manusa prasida kadi patapan i angsa sané sida ngrereh amah-amahan ring enduté kutek.

Sapunika prasida antuk titiang ngaturang indik palawatan Ida Sang Hyang Aji Saraswati, sané pinaka palawatan pangwruhan. Mungguhing ngenénin indik sapulah-palih parindikan rahina Saraswati punika wénten tigang réntétan inggih punika :

1. Ri kanjekan rahina Saraswati punika, saking semeng  ngantos tajeg surya, iraga sareng sami maturan ka sanggah utawi ka mrajan soang-soang miwah mantenin buku utawi lontar druwéné. Sakéwanten sadurung maturan nunas tirta dumun ring Ida Paranda utawi ring sesuhunan ragané soang-soang. Sasampun banten punika kaantebang raris kasiratin Tirta Saraswati ping lima. Wusan punika wawu ragané siratin tirta ping tiga, kainum ping tiga taler karaup ping tiga. Tetujon iraga nunas Tirta Saraswati punika tan lian wantah mangda Ida ngicénin karahajengan miwah kawruhan sané mautama. Tirta punika taler dados anggé nyuciang raga, ngicalang sakancan keletehan sané wenten ring angga sarira.
2. Réntétan sané kaping kalih wantah masambang semadi. Ri kala masambang semadi patut majagra sinambi ngwacén lontar-lontar suci kaagaman. Ring masambang semadi punika i raga patut mabrata tan dados mapunyah-punyahan. Tetujon mabrata punika wantah marupa latian natingin gegodan sadripuné, ngwacén lontar utawi buku-buku kaagaman pinaka tangkis majagra, sinambi nunas pangwruhan majeng ring Sang Hyang Aji Saraswati.
3. Réntétan sané kaping tiga inggih punika Mabanyu Pinaruh risampun awengi majagra, mabrata nglaksanayang sambang semadi. Bénjang semengané raris mabanyu pinaruh ka béji utawi ka segara tur matirta. Tetujon iraga mabanyu pinaruh wantah nyuciang raga turin nyupat sekancan letehé.

Sapunika tigang réntétan sapulah-palih acara sané patut i raga laksanayang ri kala nemonin Rahina Saraswati.

Inggih ida dané sané kusumayang titiang, manawi asapunika sané prasida aturang titiang majeng ring ida dané sami ngenénin indik Rahina Saraswati puniki. Manawi ring sajeroning napi sané baosang titiang i wawu wénten iwang antuk titiang matur, titiang nunas pangampura. Puputang titiang antuk panyineb atur.

Om Çanti, Çanti, Çanti Om.


masambung.......  part 2