PIDARTA SAJERONING NYANGGRA RAHINA SARASWATI (2)

Om Swastyastu, ida dané sareng sami, mawali iring titiang i riki ring blog "Sutha Abimanyu" rahinané mangkin, Anggara, ketékan ping telulas (13) sasih Maret warsa masehi duang tali roras (2012). Dumogi ja, panggihin titiang setata kénak rahayu sareng sami, turmaning nénten wénten manah wadih, simpang ring lapak titiang i riki.

Ida dané sareng sami, nénten panjang baos malih, rahinané mangkin iring titiang i ratu malih nglanturang daging pepaosan sané sampun lintang, indik PIDARTA MABASA BALI, sané daweg Wrespati, 8 Maret 2012 wedar titiang i riki. 

Ring sor puniki, wedar titiang malih daging tulisan ring pidatobahasabali.blogspot.com. Daging tulisan puniki taler kantun mapaiketan ring conto pidarta sané dumunan. Conto pidarta utawi sambrama wacana (pidato sambutan) puniki madaging indik panyanggra rainan Saraswati. Pidato puniki taler sampun olah titiang malih, dumogi nénten ngirangin rasa turmaning sida ngalédangin kayun i ratu para pamilet.

Cekidot ngih...... (^_^)!

(2) SAMBRAMA WACANA RING RAHINA SARASWATI

Om Swastyastu,

Kaping ajeng : Bapak Kepala Sekolah sané banget baktinin titiang, Bapak Ibu Guru sinamian sané baktinin titiang, Bapak lan Ibu Staf TU sané naler baktinin titiang, miwah para pasawitran titiangé sareng sami, sané tresna sihin titiang.

Sadurung titiang matur amatra. Lugrayang titiang pinaka angga sané nylewedi dados manggalaning OSIS, nyihnayang rasa pangayu bagia majeng ring Ida Sang Hyang Widhi Wasa, mapan sangkaning asung kerta wara nugrahan ida, i raga sareng sami i riki prasida nglaksanayang Pujaning Saraswati ring rahinané mangkin.

Ida dané sareng sami, manawita sampun uning nyabran Saniscara Umanis Watugunung pastika sampun iraga nglaksanayang Pujaning Sang Hyang Saraswati pinaka Bhataraning Pangweruhan. Bhataraning sang maraga Brahmancari, sakadi titiang lan para sawitra sareng sami. Ring rahinané puniki sampun i raga patut ngucap pangayubagia lan matur suksma ring Ida, mapan setata lédang Ida nuntunin i raga antuk sastra. Rasa Pangayubagia puniki minabang titiang sampun kacihnayang antuk pamargin i raga sareng sami tatkala nyanggra rahina Saraswatiné puniki.

Rasa gargita pisan manah titiang santukan nyingakin sajebag kulawarga sekolah sumuyub salunglung sabayantaka, sapunika taler para parawantaka (panitia) prasida ngelarang pacentokan penjor lan gebogan pantaraning kelas sané janten sampun kadasarin manah suci nirmala, buat nincapang rasa bhakti i raga sareng sami majeng ring Ida.

Pangaptin titiang, dumadak ngancan riwekas pacentokan sekadi puniki prasida kawerdiang malih, mangdané acara sekadi puniki prasida kalaksanayang nyabran nemu rahina Saraswati pinaka cihna pangayubagia i raga sareng sami. Titiang saking manggalaning OSIS ngaturang suksmaning manah majeng ring para parawantaka (panitia) sané sampun prasida ngamong sapulah-palih acarané puniki sané prasida labda karya tur mamargi rahayu.

Ainggih, ida dané sareng sami sané dahat wangiang titiang, wantah asapunika sané prasida unggahang titiang ring panyembrama titiang puniki.  Pinaka wasananing atur, titiang nunas pangampura antuk sapangiwang titiang matur, mugi-mugi ida dané ngalédangin.

Om Çanti, Çanti, Çanti Om.