WARSA ANYAR NAMPI SASIH KADASA

Nénten karasa mangkin sampun ngenjek warsa anyar 1934 Çaka. Wusan Tilem Kasanga, nampi Sasih Kadasa, kaciriang antuk kahanan langit sasih kadasané jakti kedas, bersih tanpa ambu. Ri kala tengai langité kedas gadang, yéning peteng akéh bintang makacakan pakanyornyor di duur langité ngiasin petengé.

Ri galahé mangkin, Sasih Kadasa nampi warsa anyar puniki i raga kaptiang mangda prasida jakti-jakti kedas, bersih, suci. Nénten ja Bhuana Agung (jagat sami) kémanten sané kedas, nanging Bhuana Alit utawi (angga sarira) i ragané naler patut kedas. Pamineh, raos, lan laksana mangda becik, mapan sampun kasuciang sami daweg nyanggra warsa anyaré puniki.

Ring arep, sadung i raga krama Hindu nampi warsa anyar 1934 Çaka puniki, i raga sampun nglaksanayang panyucian Bhuana Agung lan Bhuana Alit inucap antuk runtutan panyanggra wanti warsa puniki, ngenjek warsa anyar nampi sasih kadasa sané ketah kabaosang rahina Nyepi.

Rentétan panyanggra warsa anyar puniki pinih riin i raga sampun nglaksanayang pakiisan utawi Malasti. Malasti puniki madué tatujon ngalebur mala utawi leteh turmaning nuur tirtha amertha. Ngaruat sahananing mala sané wénten ring  jagaté antuk pamargi pakiisan ring segara, mangda Bhuana Agung lan sadagingnya  kedas ring niskala, puniki taler galah i raga para manusa nyuciang angga sarira antuk nganyudang sad ripu sané wénten ring manah.

Ping kalih Taur Agung ring rahina Tilem Kasanga, i raga ngawéntenang Tawur Agung, matetujon naurin sahananing sari sané sampun katunas antuk i manusa ngarahina turmaning nyuciang Jagaté antuk nyomia sarwa bhuta mangda nénten ngarebéda ngulgulin i manusa, mangda suci lan kedas bhuana agung i ragane. Ring angga sarira taler i raga patut nglaksanayang panyomian bhuta antuk ngamademang manah rajas (gedeg) lan tamas (males) tur nincapang manah satwam (papineh becik) gumanti sida dados jadma sujati.

Kalanturang réntétan sané ping tiga inggih punika Nyepi, sané nibénin ring pananggal apisan sasih kadasa. Ring galahé puniki i raga ngeret indria antuk nglaksanayang Catur Brata Panyepian: amati geni (nénten ngidupang api), amati karya (nénten makarya/magaé), amati lelungaan (nénten malali-lali), lan amati lelanguan (nénten dados ngarereh hiburan). Galah nyepiné puniki, kahanan jagaté gumanti kedas/bersih pisan. Nénten wenten polusi (polusi udara lan polusi suara), nénten wénten jadma clapat-clapat ring margi. Napi malih ri tatkala wengi, peteng dedet tan wénten sunaran lampu. Sami para janané mangaso utawi masandekan ring jero soang-soang, nénten nglaksanayang swadharma kadi biasané. Jakti jagaté sepi lan santi. Galahe puniki becik pisan anggén nyiksik bulu, mulat sarira, antuk mapuasa utawi meditasi lan semedi.

Wusan Nyepi, bénjangné kalaksanayang Ngemak Geni. Ngembak teges ipun mungkah (membuka), geni punika Brahma, Brahma pinaka pangripta (pencipta). Dadosné Ngembak Geni punika dina ngawawanin i raga mungkah lawang, ngarencanayang pamargi ring warsa anyaré puniki. Puniki galah i ragané nglaksanayang sima krama, ngamargiangg dharma mangda ngamolihang santi. Nah, sané kaping untat patut i raga nglaksanayang Dharma Santi Nyepi.

Gumanti pamargi sané dahat mautama pisan ngenjek warsa çaka anyar nampin sasih kadasa puniki. Manah i raga sami pada kedas lan suci nyujuh kanirmalan idep. Swasti warsa anyar 1934 Çaka krama Hindu ring sajebag jagat sami, dumogi sidha santi ring manah, santi ring jagat sekala, lan santi ring niskala. (pandejul)


Bali Post-Bali Orti, Minggu, 1/4/2012