PIDARTA "BASA BALI PINAKA JALARAN NGLESTARIANG BUDAYA BALI"

Ida dané sané banget wangiang titiang, sané arsa ring sahananing pidarta basa Bali, galahé mangkin titiang jagi mawali ngaturin ida dané antuk conto pidarta mabasa Bali. Pidarta puniki mapaiketan sareng postingan titiang sané sampun lintang. Daweg punika titiang naenin nartayang indik kawéntenan blog sané madaging entri wantah asiki turmaning ring entriné punika madaging tigang pidarta mabasa Bali. Ipil titiang pidartané punika turmaning olah titiang malih mangda sumingkin dangan ida dané ngawacén. Sané mangkin mawali aturang titiang i riki ring ida dané para pamilet, dumogi ngalédangin.

Pidarta punika sané kapertama mamurda "Pidarta Ring Sajeroning Nyanggra Rahina Saraswati", sané ping kalih mamurda "Sambrama Wacana Ring Rahina Saraswati", sané ping tiga wantah marupa pidarta persuasi ngenénin indik kampanye kawéntenan basa Bali, pidartannyané kadi ring sor puniki.

BASA BALI PINAKA JALARAN NGLESTARIANG BUDAYA BALI

Om Swastyastu,

Basa Bali ring aab jagaté kadi mangkin sayan sué sayan ngidikang anak sané nganggén mabebaosan, utaminnyané para anom-anomé. Tios pisan kadi kahanané dumun basa Bali kantun pinaka basa utama ring sakancan bebaosan. Sané mangkin yéning ida dané mamargi ka pasar matumbasan, nyingak anom-anom matumbasan, "Buk, canang yang ini berapa satu?" kénten bebaosané sane kapireng. Dahat sénglad sujatine pirengang, numbas canang kémanten nganggén basa Indonesia.

Napi mawinan asapunika? Minab i raga sané nruénang kimud nganggén utawi nénten uning mabaosan nganggén basa Bali. Indarang yéning mangkin wénten anak matumbasan kadi wau nganggén basa Bali, "Buk canang sané niki aji kuda asiki?", pastika sampun lian antuk i raga mirengang, wénten manah sané nuldul tatkala mireng anak mabaos kadi punika, santukan basa Bali punika dahat luih manut ring tata titi basanyané taler madué pangargan sané mautama ring sajeroning anggén mabebaosan.

Ring tanah Bali puniki raga embas pinaka pabesen saking Ida Hyang Parama Kawi, majalaran i raga manumadi dados jadma Bali, jagi ngangganin utawi miara tetamian saking leluhur i raga. Nénten sios marupa warisan budaya pamekas basa kalih sastra Kawi Bali druéné, sané dahat kasumbung luwih ring jagaté. 

Punika awanan sapunapi antuk ngwerdiang kalih nglimbakang basa Bali i raga sareng sami, pamekas para anom-anomé mangda ngawit mangkin sayan seneng malajahin utawi nelebin basa Bali. Basa Bali sané kasub ring jagaté, pinaka basa daérah sané madué pangempon dahating makéh yéning imbayang ring nusantara puniki.

Ida Dané sané dahat wangiang titiang, manawita sampun akéh jalaran sané katempuh olih Sang Niti Praja minakadi ngranjingang basa Bali ring sajeroning pendidikan formal pinaka muatan lokal ring sekolah-sekolah, taler sang maraga Niti Praja sané pinaka murdaning jagat Bali stata nglaksanayang Utsawa Dharma Gita nyabran awarsa, puniki taler utsawa sang ngamong rat nglestariang basa, sastra, lan budaya Baliné. 

Yan sakadi amunika pakardin Sang Niti Praja ring utsaha nglestariang budaya Bali pamekas basa Bali, amunapi utsahan iragané nyugjugin, nunjangin utsawa sang niti praja pacang nglestariang basa lan budaya Bali druéné? I raga nénten patut tan pati rungu utawi tan éling tekénin kawéntenan basa lan budaya Baliné.

Siosan ring sang niti praja, Universitas Udayana, Undiksha Singaraja, FKIP Universitas Dwijendra, IKIP PGRI Bali, lan IHDN Denpasar naler sareng nglestariang basa Bali druéné antuk ngwangun jurusan Bahasa lan Sastra Bali muah Pendidikan Basa Bali, sané kaaptiang mangda sida dados lembaga formal sané satata ngalimbakang basa lan sastra Baliné antuk mendidik calon-calon sarjana Basa Bali lan Guru Basa Bali. Para sujana sané lulus saking i riki karepang dados generasi penerus yowana Bali sané riwekasan prasida ngamel tur nglanturang pangajahan basa Bali ring pratisentana i raga. Siosan ring punika taler jurusan pendidikan basa Bali punika nyabran warsa ngawéntenang pacentokan-pacentokan minakadi, lomba pidato mabasa Bali, masatua Bali, nyurat lontar nganggen aksara Bali, Macepat miwah sané tiosan, sané sampun sapatutnyané i raga ngaturang pangargan sané pinih becik ring instannsi punika. 

Ida dané sareng sami, punapi mangkin antuk, mangda prasida ngawit dewék padidi mautsaha nganggén basa Bali ngantos prasida ngiyusin anak tiosan sareng nganggén basa Bali. Mangda nénten wénten brayan i ragané sané kimud nganggén basa Bali Mabebaosan. 

Santukan punika ngiring biasayang ngawit ring dewek padidi, ring kulawarga nyantos ring pasawitran mangda nganggén basa Bali. Santukan yéning wantah terus pinehang ring kayun kémanten, nénten kalaksanayang minab méweh karasayang. Nanging, indayang mangkin sarahina mabasa Bali, mangda nénten ajeg Bali wantah ring lambé kémaon. Béh sami.... "ajeg Bali, ajeg Bali, ajeg Bali", latah ngraosang ajeg Bali. Nanging sujatiné entip puun nénten wénten...! Mangdané nénten asapunika.

Ida dané sareng sami, titiang nunas ampura ping banget ngaturang sakadi punika, santukan napi? Mapan meled manah titiang jagi nyarengin ida dané mangda sayan seneng, sayan wikan mabasa Bali. Mangda ida dané sauninga, daweg dumun titiang ring Jawi, duk titiang ngruruh widya ring ISI Jogja. Titiang marasa elek ring manah, napi mawinan? Santukan i rika titiang katakénin indik basa Bali olih sawitran titiang wong Jawi. "Boim gimana sih sebenernya sor singgih basa itu? Apa alusnya kemaluan laki-laki?” Ané sakadi punika pitakén-pitakén sané katakenang sareng titiang. Daweg punika makebyah ring manah titiangé laut kabilbil tan sida titiang nyawis pitakéné punika. Lek, lek pisan titiang wong Bali tan uning nyautin pitakén jadma tiosan indik basan titiangé néwék.

Minab ida dané sami wénten sané madué pengalaman sakadi titiangé punika? Raga saking Bali, tan prasida mabasa Bali, minab kaucap Bali oplosan yen kénten. 

Munguing asapunika atur pawungu titiangé, boya mamanah jagi nasikin segara, titiang sampun uning, ida dané sareng sami sampun wikan-wikan. Malarapan antuk galah sané becik sakadi mangkin, titiang banget mapinunas majeng ring ida dané sami, ngiring ja mangkin i raga sareng sami nguratiang, nglestariang turin nganggén basa Bali druéné mangda sida ajeg kawekas, nénten malih nemu kapialang sakadi titiang ring arep.

Taler ring para yogia sané ngawiwenangang pendidikan, mangda mikayunin saha ngamargiang pawungu ring para anom-anomé ring sekolah. Pradéné prasida kapanggih sakadi pangaptin i raga sareng sami majalaran nelebin basa Bali turin prasida nglestariang budaya Bali iragané. 

Ida dané sareng sami sané kusumayang titiang wantah asapunika prasida aturang titiang ring tepengané kadi mangkin, cutet atur titiang ngiring sareng sami ngawit mangkin tunggilang kayuné ring sajeroning ngawerdiang pingkalih nglimbakang basa Bali druéné, kandugi prasida kapanggih napi sané kaptiang i raga sareng sami. Pradé wénten ring sajeroning atur titiang i wawu, manawi kruna utawi luir ipun sané tan menggah ring kayun ida dané sami, lugrayang titiang nunas geng rena sinampura.

Makawasananing atur titiang ngaturang paramasanti.

Om Çanti, Çanti, Çanti.