JUWET SING RUET APIN YA SEPET...!!

Sameton Sutha Abimanyu sareng sami, punapi gatra? Dumogi stata ngamolihang karahayuan, nyen ja, dija ya, pidan ya, jeg pang seger tur ngamolihang rejeki. Nah.. Nyanggra pacang libur panjang Galungan Jawa alias Idul Fitri niki, wenten rencana liburan malali kija niki? Yen ten wenten, indarang malali ka peken sane nampek ring genah ida dane soang-soang, rereh buah sane wenten ring gambar sor puniki...!!!

Buahne selem-selem sepet manis..!!

Wenten sane uning buah napi niki? Buah niki pepes anggena macecimpedan ring sekolahan. "Apa ke tai belek magantung?", Nahh... nika cimpedannyane...! Buah napi ngihhh.................???

Passs....! Niki sampun madan buah JUWET. Buah juwet ring aab jagate mangkin sampun langah. Kone, buah juet nika pepes Tonya'an (demenin samar), dadosne akeh sane kapademang, ulian jejeh gugul tonya (kone). Beneh ken pelihne jeg sing suba nawang. 

Inget pidan tiang di desa demen pesan ngosok punyan juet di nedeng ye mabuah. Ngajak timpal-timpale, majalan manjus ka tukade, sambilang ngalap juwet malu. Kanti selem/pelung  telah gigi lan isite ngajeng juwet, rasane sepet-sepet lan manis. Melahang milihin buahne, pang sing bes sepet. Ane gadang nu nguda, ane barak nedeng nasak, ane selem ne manis sawireh suba nasak.

Juwet sing ruet diapin ye sepet..!

Kocap punyan juwet madue kagunaan sane becik, saking babakan (kulit kayu), don, buah, lan batune madue kasiat kanggen tamba (ubad). Sakadi kencing manis, kolesterol lan diare. Juwet puniki ring tanah Jawi kawastanin buah Jamblang utawi anggur Jawa (yen di Jawa anggur Jawa, yen di Bali juwet, adi sing anggur Bali nah?), patuh kocap punyanne tenget, tongos kuntilanak maglantungan (kone-sumber sing jelas ne). Punyan juwet ngelah masih adan latin (ngruetang bedik), syzygiun cumini, apa kaden artine, sing ba tawang. Hehehehe...!! Buah juwet puniki madue kandungan toya (air) sane akeh turmaning kaya vitamin A lan C. 

Ida dane sameton Sutha Abimanyu sane meled ring buah puniki, rarisang ngarereh ring desa-desa utawi peken tradisional, da ngalih ka peken modern cara di Mol-Mol, jeg suba pasti sing ada. Nak ngelah masan masih ia mabuahne, biasane nuju masan ujan.  Buina juwete jani suba ngancan langah (langka). Ne perlu perhatian pemerintah, utamane dinas pertanian, pang da kanti punyah (ehh.. punah mksudne) punyan juwete.

Men sira manten sane sampun taen ngajeng buah juwet? Penekang limane...!!