Basang Seduk I Mengong Nagih Madaar

"Layah basange puk, ija ngalih makan Nang?" 

"Bah cai ngaba basang seduk doen bilang ajak kija-kija Yan." Dengkik Nang Tegteg ngajak pianak ipune paling kelih ane madan I Wayan Mengong. 

Tengaine ento, ajaka dadua sedeng luas ka terminal, lakaran ngalih montor tambangan ane luas ka Badung. Tetujone tuah ja nelokin nyaman Nang Tegteg, ane suba aminggu merawat di Rumah Sakit Sanglah. I Mengong uli mara majalan suba terus ngibukang dagang sate languan di Terminal Peken Kidule, kone jaen misi srombotan mabasa lalah. Padahal, satonden majalan nak suba ngajeng jumah ajaka Bapane. Sakewala nak buka senggakane basang karung, jeg suba ya marasa seduk basangne. 

"Nang, bindan ked?" 

"Ked dija bayun cine Yan? Di terminal apa di Rumah Sakit? Karuan nu mejalan kene enotin cai!"

"Ked di dagang nasine!"

"Aih.. Ba layah pesan basang caine ne? Bes mara ke madaar! Kadirasa liunan isin piring caine ketimbang Nanang!"

"Ba ja telah bayun nasine tuni anggo mejalan toh! Buin to sambatang Nanang ping keti bara"

"Aruh, Nah ba ja keto, mai suba ngalih nasi malu, mumpung ba ked di terminal, ento dagang sate ane acepang cai masih ye mabukak!"

"Nah, keto nae Nang, mara nanang sayang adane!" Lantas ajaka dua ngojog dagang nasi be pasih di delod terminale. Bah liang pesan bayune I Wayan ngaud sate languan. 

"Adeng-adeng madaar Yan, pang sing simpatan!" Pinget Nang Tegteg teken pianakne.