LEGENDA: DEWI DANU

DEWI DANU

Manut I Ketut Budiharsana saking Banjar Sindu Ubud. Mapan Ida  Dewi Danu praragan istri, praragan toya. Tedun ida katitah antuk Hyang Pasupati saking Gunung Semeru.

“Dewa, muh kema muh, landuhang jagat ring jagat a Bali. Ida idewa ane  ngadegang.”

Sangkal lunga Ida Hyang Pasupati, Hyang Geni Jaya, Ida Batara Dewi Danu. Ditu Hyang Gni Jaya, mapan kal palungane ngranjing jani ka tengah, tengah bungkak nyuh gadinge. Jani mlinggih ida dane sareng sami di tengah bungkak nyuh gadinge, kal lunga ngungsi jagat irika.

“Peh, mabisama Ida Hyang Geni Jaya, “Sugra ratu pakulun, tiang nak praragan geni, yen tiang ngranjing di tengah bungkak padem titiang.” 

“Nah idewa da ba malinggih di tengah bungkak. Di pertiwi idewa mamargi, bedah lantas di Gunung Toh Langkir.”

Ditu lantas ngepah raja, Ida Hyang Putra Jaya malinggih ring Besukihan, Besukih, Ida Hyang Geni Jaya malinggih ring Lempuyang, Ida Dewi Danu mlinggih ring Batur. Kasuwen-suwen raris ditu pada rasa ngema  mamargi. Ida, sugra pakulun, Ida Batara Hyang Geni Jaya ngamel jagat sajebag Nusa Bali. Ida Hyang Geni Jaya ngamel linggih ida ring Lempuyang, lampu ngaran sinar, Hyang ngaran widhi, kawastanin Gunung Lampuhyang, pralinggan Ida Hyang Geni Jaya. Nyen sing inget nyen ken kawitan, sing inget ken katatwan, katibak danda antuk Ida Hyang Geni Jaya.

“Ratu ratu Batara Hyang Pasupati, duaning titiang praragan istri, mangkin driki malinggih di duur batune, karyanin titiang tetamanan.”

“Bah nah yen keto cening, saja!”

Ditu Hyang Pasupati, kapastu wenten tirta embas, kapacok batu, medal tirta saking selagan gununge, selagan  batune.

“Ning dewa, tirta ne medal di selagan batu nenenan wekas wenari wekas wastanin nyen tirta bungkah, tirtan idewa jani ne. Pang dadi mertan jagat sajebag jagat Nusa  Bali, dadi sumber toya idewa dini. Mapan idewa jani malinggih di duur batune, jagate ne dini nyen kawastanin jagat Batur.” Mangkin malakar bendungan, tetamanan pang nyak degdeg toya, toya dadi mertan jagat sajebag Nusa Bali. To lantas ida nibakang tirta sangkal pusat toya di Batur, tongos tirtan sawah amertan di Batur genahne. Ditu kocap sangkal malinggih, “ada jani palinggih idewa dini ring tirta bungkah nenenan, yen wekas wenari wekas palinggih ne adanin Ulun Danu. Ulun Danu ring sajebag tirta bungkah, to mawanan  mapesengan tirta bungkah sawireh tirta medal uling di  bungkahan batune. (by: Sasda'06 Unud)