MALAJAH SING ADA RUGINA!

"Pa adi ngancan ruet idupé tepuk nah? Pidan ngalih sekolah lan kuliah suba kéweh, jani jeg ragu keneh tiangé disubané imang tamat ené. Mapan jani liu tepuk sarjanané nganggur, kéweh ngalih geginan. Jeg pocol asana masuk, sing maji ijasahné. Né ada buin, ya suba magaé, sakéwala tamatan sekolahné apa? geginané jani apa? Jeg sing ja nyambung! Yén kéné terus tepuk, adénan suba tiang sing kuliah pidan pa!"

"Yéh,, ngudiangi cening ngomong kéto? Dong apa kar seselang kanti ngorahang pocol masekolah? Guru jak dosén né dija ngorahin cening masekolah ento mamocol? Nah orahin Bapa jani?".

"Nah sing ja ada guru jak dosén né ngorahang kéto. Tiang ja makeneh kéto padidi. Ulian tepuk timpal-timpalé ané malunan ba tamat, mincerang ijasahné ideh-ideh konden masih laku. Payu ya mamuruh sing nganggon ijasah kuliahné, kanguanga pang kwala magaé koné".

"Ohh.. Dong né mara pabeneh ceningé gén! Kadén Bapa ada gurun ceningé né di sekolah ngorahin kéto. Yén kanti ada guru ngraos buka kéto, bani bapa lakar mlungguh guruné totonan".

Nah, kéné ento ning, bapa bani ngorahin cening jani, mapan bapa pinaka rerama, pinaka guru rupaka, yadiastun ké bapa tuah tamatan SR (Sekolah Rakyat), cening suba mahasiswa, sakéwala bapa nu antes nuturin cening mapan enu madan liunan bapa ngrasayang pait pakeh idupé.

Unduk masekolah, ento sing ada rugina. Mapan masekolah ento anggon nincapang kaweruhan. Apang sida cening dadi jadma sujati. Su artiné 'melah', jati artiné 'seken-seken', jadma sujati artiné jadma ané seken-seken melah. Melah ring raos, melah ring parilaksana muah melah ring papineh.

"Nah yén unduk to dong ba beneh pa. Saja mula pamunyin bapané, tiang suba nawang......"

"Endén malu selaga munyin bapané ning, dingehang malu bapa".

Cara jaman janiné, cening suba nawang kemajuan teknologi ngancan pesat, informasi ngancan aluh baan ngalih. Uli tv, radio, koran, apa buin cara jani ada internet. Makejang sarwa aluh cara janiné, sakéwala da makejang ulah-ulah tampina, apang nyidaang cening nuutang ané kén perlu ané kén sing. Beneh baan cening nyaring informasi né cén patut plajahin né cén sing, sinah cening nepukin jalan ané melah. Tusing lakar cening lilig jaman, buka bapa jak i mémé cara jani. Kadi rasa mecik hp bapa tusing bisa. Tuah nyidaang ngang kin ngep nepukin teknologi cara janiné. Yén sing cening masih ngorin-ngorin bapa, méh kanti ngidupang tv bapa sing bisa.

Ento mawinan bapa tusing taen marasa pocol nyekolahang cening, mesuang prabiya gedé-gedé lakar ngetohin pianak. Apan bapa masih nawang, sing lakar nyidaang ngamekelin pianak baan warisan brana riwekas, kangguang ilmu bekelin bapa cening pinaka warisan majalaran baan nyekolahang cening sategeh-tegeha, sasidan bapa baan nyujuh. Mapan tuah ilmu lan kabisaan, pinaka warisan ané langgeng. Nyidaang anggon cening bekel kariwekas.

Nah yen ajanian unduk geginan ané seselang cening, ento sing mangkuh ndén. Suud monto nyesel, mapan sing ad untunga cening maseselan. Paling melah apa ja ada geginan, jeg jemak. Asal suba tekun baan ngaginain, pastika nekaang asil. Yén nyidaang da kanti ngarepang geginan uling anak lénan, padidi pang bisa ngaé geginan, apa buin kanti nyidaang ngaénang nak lén tongos magaé. To né kaucap sarjana mautama.

Suba ngerti jani cening? Idup ento sing dadi uyak sesel, yén uyak sesel, apa sing lakar dadi, sajaba lakar dadi jadma konsumtif ané lakar lilig jaman. Utsaha ta larapana, idup ento patut malarapan baat mautsaha. Yan suba mautsaha, sinah lakar nepukin asil. Jani utamayang malu cening kuliah, masuk apang seleg. Da maguyu-guyuan, apang énggal cening tamat. 

 

"Ngih pa. Ampura pesan tiang pelih papineh pa. Ri tatkala tiang kapetengan buka jani, bapa mula ané sida ngemaang tiang sundih. Tiang masih ngaturang suksma tekén bapa lan i mémé, yadiastun i raga pas-pasan kadané, kéwala bapa saat masih ngasukang tiang kanti kuliah, apang sida tiang magelar sarjana. Tiang majanji sing ja buin nyelsel raga, tiang lakar mautsaha, malajah apang seken, apang sida ngaénang rerama bangga. (pandejul)