MALALUNG

Sedih, ento tuah rasayang tiang ané jani nepukin pertiwi Baliné. Apa ané makada kéto? Sawiréh nepukin ibu pertiwi Baliné jani ngancan cupit ulian beton-beton pajéjér makebér paslérsér nyuksuk nyeleksek ngebekin padet ngaé sesek ulian i manusa sing nawang lek, ngisinin ambek keneh ngawé makejang berek. Ulian momo ngisinin ambek nuutin jaman, ulian aluh sing ngalih sasuluh, sing nyak tuyuh mesuang peluh.

Jadma Bali jani liunan engsap, dot bungah ulian géngsi makejang demen mabarisan, adep kanan, adep kiri ngadep tanah warisan. Tanah leluhur, tanah ané tusing gelahanga baan gunakaya padidi telah kadep tekén jadma pangumbara lan dura negara. Ulian demen ajum ngisinin keneh élah, demen maceki, matajen, mamunyah lan ngalua nguberin Mbak Yu, jani carik telah dadi pabrik lan diskotik. Alas, gunung, abing lan pasih telah makapling dadi perumahan, bungalo, kafé, vila lan hotél. Sing inget matolihan ka samping.

Yén kekéné jejeh bayuné jadma Bali cara nak Betawi, di gumi padidi nyakit hati. Masisihan ulian kasesek baan jadma pangumbara.

Makejang ulap baan pipis barak magambar mawar mapesel-pesel. Suud madepan makejang paek pang maan tréstésan, Nang Kocongan nadak sara dadi Pak Bos. Sing inget pipis ngancan makelo ngancan nelahang, pipis telah, gengsi nu gedé, ané anggon magéngsian suba telah, paling inguh kipekan séngap cara barong sépak. Makejang suba telah buka tidik anggon ngisinin géngsi, pipis asil mabarisan suba telah, pianak kurenan makenta sing karuan. Budi kar magarapan di cariké, tanah ané lakar garap suba madep.

Timpal ané biasa ngaukin Pak Bos ngejohang sakabesik. Sing saja dadi timpal sujati, disuud madepan makejang ngaku timpal, ngaku manyama teka saling langkungin, saling pajumin ngaukin Pak Boss. Pipis suba telah, Pak Bos dadi Nang Kocongan buin. Kudiang baan madaya? payu maseselan. Sing inget sentana ané bin pidan sing ada ané kawarisin.

Ento patut dadi peplajahan i raga ajak makejjang. Mawinan da pesan demen ajum, ngawag-ngawag mabarisan (madepan), apa buin tanah leluhur. Mapan tanah Bali ené boya ja tanah ané anggona madepan. Inget-ingetang tutur lingsir-lingsiré pidan. I Raga lekad malalung ka marcapada, tusing ja mabekel tanah. Yén jani i raga bani-bani ngadep tanah ané dong gelahang i raga, buin pidan pertisentanan i ragané tusing lakar nepukin apa.

Kadirasa yén ada ké anak ané ngadep tanah Bali makejang, pasti lakar marebut belina ajak wong pangumbara lan wong dura negarané. Telah tanah Baliné kadep, bin pidan i raga mati ija kar matanem? kanti tanah sema yén di Bali pasti ada nak meli. Mapan makejang nawang, tanah Bali tanah mataksu, tanah subur wit sahananing merta di marcapada.

Lan jani ajak makejang krama Baliné mataki-taki, rapetang papinehé, suud amonto ngadep tanah leluhur, mapan tusing ada anak sugih ulian ngadep tanah. Ingetang tanah ento ibu pertiwi, ngadep tanah marti i raga bani ngadep ibu pertiwi, ngadep i mémé. Yén kanti i raga bani ngadep i mémé, dong amat gedén dosan i ragané? Lan pinehang melah-melah lan inget, iraga lekad malalung, mati masih malalung, tusing mabekel apa. I raga hidup acepok, apang sida ngawé ané melah  lan luung. (Pandejul)