SATUA SATONDÉN 4 (Basang Bawak)

"Jelema kelengggggg..... uyuuttttt............!!! Jeg peta-peta gen gelahanga jelemane totonan. Yen sing maan mapeta nang akejep mirib bangka bangkungne jumah. Ideh-ideh ngaba raos ane boyo-boyo! Makejang tuturanga sing je taen matilesang awak! Suba karuan nake ortanga demen?! Sing....!!! Panes basane nepukin jelema-jelema cara keto, tumitisan apa mirib pidan lemane nenenan?!"

"Tumitisan kerikan kawah ladne Man!", Wayan Wayahan uling joh nyelag munyin adin ipune, I Nyoman Anoman tatkala ipun sedeng dengkik-dengkik di pakarangane teka uling diwangan.

"Nak apa ladne unduke cai dengkik-dengkik keto Man? Nyen mirib ane ngae cai gedeg buka keto? Nang melahang jani tatasin beli unduke. Nak sing ja luung dingeh iraga di pekarangane uyut guak-guek keto, apa buin nuju sandikala cara jani. Nyanan cai rangsukin buta, peteng makejang. Kalane nyusup ngerangsuk angga, nyanan nak beneh-beneh matakon bakat bareng dengkik! Mai tegakang ibane dini! Kaden cai ngaku ke warung meli jagung malablab, ken jagungne?"

"Kene bli Wayan, icang bes keliwat gedeg saja mara, makelo icang nangkek basang gedeg apang tusing kanti di sisi icang ngambres-ngambres ngae uyut cara truna-trunane elenan. Pamuputne miyegan peturu timpal. Ento ne jejehin icang, sangkalanga jumah icang mesuang gedeg basange, pang kwala maan pesu dogen". 

"Ohhh keto, nah luung ja cai nu ngidaang makeneh leser di sisi. Nah ne penting cai nu inget gen! Men apa undukne?"

"To tuni icang kaden suba maorahan jak beli, icang pesu ke warung jebos meli jagung, nah konden cang teked di warung, mara delod warunge, saget dingeh I Ketut Umih Bungut Lambih guer-guer ngortaang icang jak beli ditu. Orahanga icang ubuhina baan janda sugih buin malengis di Badung, sangkala mulih-mulih ngidaang membangun, ngidaang meli motor, ngidaang makarya di sanggah. Magenep ortan yene. Beli ngidaang mapitulung ulian liu ngelah pipis, beli orahanga ngalih bererong sangkala aluh kone maan proyek! Pelih icange, to kat dingehang makejang satonden icang macelep ka warung. Jeg ngeruet basange, suba sing tahan icang baan munyin yene, nyagjag icang macelep ke warunge....".

"Men..., jagur cai nake I Ketut?"

"Sing.. beli! Cang nak nu inget, nu ngelah wiweka, amonto maan pengalaman di luar, masak cang nu ngaba basang bawak?! Biasa cang macelep, jeg buka jangkrik ketebin ye, sing ada nak bani ngomong kangin-kauh! Biasaang icang ja masih nyapatin I Ketut, mapan cang marasa nu manyama, wak beneh mamindon! Meli cang jagung laut icang mulih!"

"Ohhh... kaden nak jagur cai I Ketut! Nah sukur cai nu inget manyama jak ye, apin jelek bana ngortaang iraga, da to lantanganga buin. Nak mula ye I Ketut bungute sada lamis. To makada liu brayane sing demen jak ye. Nah yen alih-alihang mula nak sing ja joh jelema ne kal dadi musuh diraga, tuah ja nyama pepesan ngae uyut. Kwala iraga dadi jelema ne inget, sing dadi nuut keto. Mirib ulian cai sing ngemaang gagapan ia teka ling Badung! To anggona gedeg...! kadena bana sing inget manyama, mirib memene jumah sing nuturin ye, beli dipuan nak ngabaang baas akarung, mapan ngaku sing ngelah baas memene. Men cai ngaku meli jagung, ken jagunge?"

"Ae bli, saja mula keto, nake iri sing pandang tongos sing pandang nyen, apin nyama jeg suba anggapa musuh. Yehh.. saja, jagunge bakat pantigang icang di natahe mara. Baan gedeg basange.. sap cang bli".

"Nah payu ja siape jani maan nunas paica.. Nah-nah.. depang suba. Jani luungan ngopi malu neh, kanguang wanen, suba ja jagunge entungang cai. hehehe...! Luh seduh kopine malu...!"

-puput-

*Rereh napi suksman caritane ring ajeng......!! ^_^