Aéng Sugih Jelemané to! Ngepét Kayakné!

"Yan, tepukin cai I Madé Roy Idup Jaya tuni di aep banjaré? Jeg nécis gayané, bokné klimis, gaya nyetir Pajero cara artis, mobilné baru malengis, selem nyalang maklenyis. Ngaé iri doén nepukin jlemané to! Kénken menurut ci Yan? Apa sujatiné gaén iyané? Taén sing cai nepuk iya pesu magaé? Kantoran boya! Bisnis toko kosing! Rentainir masih sing! Apa sujatiné makada iya sugih Yan? Cai kan paek makanténan jak iya! Nang jelasang apang waké sing gagal paham!," Nyoman Lamis Kepo nyumunin tutur ajak I Wayan Waras, nuju negak di penggak Mén Anteng Masari sanjané ento.

"Ahh..?! Ané kéto-kéto ajin ban cai merhatiang Man! Waké gén sing rungu! Dong Madé Roy Idup Jaya tuni to liwat ngaba Pajero Sport Dakar tipe baru o? Gagah mula! Liu pis iyané jani."

"Cai pocol mata gén papat! Oo, iya suba to nok!," Saut Man Lamis Kepo sambilanga ngenggekang tentasné I Wayan Waras das nyeréndéng ngapluk jelanan penggaké.

"Aduhh.. Cai Man, gigisang anaké, das aké labuh!"

"Men, unduk Dé Roy meli mobil baru to, saja kayakné Man! Puan kak angku cangé jumah nak katuur ngantebang banten ngulapin mobil baru sik Dé Royné, Man! Mirib to ba mobilné."

"Suksés iya I Made Roy jani Yan! Léting masuk SD iraga ajak patbelas, iya gén suba ané nyidang makinkinan ékonominé jani. Apa gaén iyané sujatiné? Da..da.. Ngépet jemaka gaén iyané! Ato ngubuh tuyul? Bihh..! Luung to, aluh! men kéto, iraga malajah kemu, nyén nawang iya ngadep Tuyul second!"

"Ahh.. Datak-datak ortang cai Man! Ija ada gumi modern cara jani, enu anak ngubuh tuyul, ato dadi babi ngépét? Cai kena pengaruh berita Hoax di sosmed ané sedeng viral to! Bak ci bayangkan, men di Bali ada babi ngépét, sing malunan maguling iya?! Hahahaha..," Yan Waras kedék ngakak ulian raos Nyoman Lamis.

Ningeh tutur duo kanténan tukang bon di penggaké ngorta kangin kauh, dadi bareng Mén Anteng Mesari, owner penggak Masari cucud matakon ajak Wayan Waras unduk patuh patakoné I Nyoman Lamis Képo. 

"Aa Yan, apa gegaén kanténan Wayané to? Jeg sugih iya jani! Méméné I Made Roy to yan mablanjo mai, nak pipisne satusan kenceng doén! Pdahal mablanjo tah lima ribu! Jeg cara bonggan, pang tawanga ba sugih, pipisné barak-barak! Nyaru, nukar pipis mai mablanjo tah lima ribu!"

"Bah, Mén Anteng bareng soléh-soléh né! Hahahaha.. 😂😂" Bungker Wayan Waras ngedékin dua orang képo di penggaké.

"Cai pragat kedék gen Yan!," Damprat Man Lamis. 

"Kéné to Man, cai idup di jaman modern, nglah hp android anggon cai maén game PubG ajak Mobile Legends gén! Apa ja tawang cai! To Dé Roy nak liu pipis ulian AdSense nok. Iya dadi Youtuber, dadi blogger, buin misi ddi programer. Jelema magae di laptop! Di komputeré gén. Uli kamarné nyidang ngasilang pipis! Waké awalné, patuh cara cai, sing nawang kéto-kéto. Iseng kalalinin iya mulihné. Nak masekeb di kamarné gén suba iya. To tes oraina cang gegaén iyané di laptopné, kanti saldo AdSense icang édéngin jak iya. Mula cerdas cicingé to!"

"Ndén malu Yan! Apa to AdSense?"

"Apa men? Alih gén di google Man! Bakat ba. Hp cainé manfaatang naé!"

"Nah ru...!! Béh kéto gegaén Made Roy pantes ja kapah pesu. Perlu iraga malajah jak iya ne Yan. Ajaka dadi Youtuber bareng nyen. Ngae video lucu-lucu!"

"Ahh, lucuné sing ada, tengal payu! Uyak hujatan nitijen payu cai Man! Hahaha.."

Payu makedékan duo kanténan Nyoman Lamis Képo ajak Wayan Waras di penggakné Mén Anteng Masari. Sedangkan, Mén Anteng tetep bingung kin apa tuturanga duo kanténan nto. (PKJ'Kendri09052021)