Kadén Aluh? Berat Dadi Mangku!

Sawatara galah sanja, séndéng Surya Kauh, Nang Tegteg luas sangkep ka Banjar. Unteng sangkepé tuah lakar milih calon Mangku di Pura Désa lan Puseh. Suba nem bulan kekosongan jabatan Mangku Kayangan Tiga, kondén cumpu ida danéné tekén calon Mangku baru asil janjanan lan asil lot ané suba liwat.  

Léwat sandikala, dauh pitu Nang Tegteg teked jumahné teka uling sangkep di Banjar. Sebengné marungusang, sada misi klecet-klecet bibihné, buka ada ané ngalikadin di kenehné, buat asil sangkepané. Katolih baan kurenané sing luung sebeng, Mén Wayan laut ka paon ngaé kopi duang gelas. Misi gorengan sélo sawi, maimbuh sambel tomat manis. 

"Bli, néh kopiné. Kangoang timpalné sélo magoréng. Siupin malu. Pang suud bli masebeng marungusang kéto," kopiné katuunang samping Nang Tegteg negak di balé Dangin. Laut ngaukin pinakné amata wayang, I Wayan Agus Mengong Arimbawa, apang pesu uli kamarné.

"Yan.. Yan Agus..! Suba suud maséh to? Mai pesuang ibané, timpalin I Nanang Ngopi. Sambilang apa tulungin mémé nyait porosan, da jeg mecil hapé gén di kamar," raos Mén Wayan ngaukin pianakné ané mar suud manjus laut meséh di kamar. 

"Nah Mé, jani ba," pesu I Wayan Méngong nyagjagin mémé bapané. Negak laut nyemak gelas kopi tur ngerosin kopiné ané enu panes. 

"Gerosss.. Ahhh.. Jaen kopiné I Mémé! Numéro uno pokokné. Kopi seruhan tuni kanyanyah o?"

"Oo.. to ba kopi ané alap cening ditelun di tegalé. Aget énggal Wayan ngalap, sing kéto pisagané ngemalunin ngidih sing maoraan! To séloné ajeng, ketul-ketulin sambel, jaen pesan!"

"Saja mé, jaen pesan, ba cara nak Sulawesi doén mémé né, ngajeng sélo magoréng misi sambel! 😂😂 Pasti paksana jak ané nulis satuané né nyangin sélo maforeng matimpal sambel. Sajaan nak Bali Sulawesi.." 😂😂😂

"Ah, sing dadi kéto ning. Nak nyama di Bali pang nawang masih kebiasaan nak Sulawesiné. Hehehe.. Nto timpalin malu I Nanang."

"Oo, Nanang éngkén tumbén nesil? Inum kopiné nang, pang sing énggalan gesit. Sing nyak jaen ya! Engkén, koné Nanang sangkep tuni, Nyén payu dadi mangku anyar? Kayang piodalan Buda Kliwon né kar mawinten? Nyén kasudi ngayah nang?"

"Ahh.. Jeg uli ija baan Nanang nuturang né! Inguh bana kéné," Nang Tegteg laut nyemak gelas kopiné laut nyiup telung gerosan. Mimbuh nyokot sélo magoréng ketul-ketulanga di sambel tomaté. 

"Kénkén, nyak jaen bli sélo magoreng misi sambel? Resep nyama si Sulawesi né," Mén Wayan magesah sambilanga ngaba lumpian misi toésan busung, basé, semat, miwah adonan pamor misi gambir lan buah. Tulus ipun lakar ngaé porosan. 

"Bah sajaan nyak jaen gorengan sélo misi sambel méméné. Né godohé ketul-ketulin sambel jaen masih. Hahahaha.. Bah dueg nempa rumus masakan né!," sada ames Nang Tegteg nginyukang goréngan lan nyiup kopiné. Buka engsap napi masalah ipuné. 

"Nanang kondén nyatua né, men kenken nanang teka uli sangkep marungusang?," patakon I Méngong ajak Bapané sambilanga nyait porosan. 

"Ahh.. Saja! Kéné to cening lan méméné. Nanang kena lot dadi Mangku Pura Desa lan Pura Puseh ajak Nang Candra di pesangkepan. Sada ba final sing dadi nolak, tur suba atur uninganga di Pura kin jro kelihé!," sada nyeroscos buka sepur Nang Tegteg masaut. 

"Apa..? Dadi mangku?," barengan Men Wayan lan I Méngong masaut buka makesiab, tapi selow. Buin iya ajaka dua ipuh nyait porosan. 

"Ba ja kéto, ngayah naé. Ngudyang to sebengin beli. Luung ba dadi mangku, bli cocok wak suba umur, maan banya luputan di banjar," saut Mén Wayan énténg. 

"Cocok to Nang, aget nyanan nanang dadi mangku. Saat Nanang ngetisin tirta ibuk-ibuk PKK ajak bajang-bajangé, sela Nanang maan nolih nyuh bulan makalangan sada kembar moleh-moleh. Biar guminé Tilem, jeg cara Purnama kar tepukin nanang uling duur. Hahahaha.. 😂" I Mengong masaut banyol laut katutug ban lametan busung méméné di tendasné I Mengong. 

"Soléh-soléh kenehanga Mémé ajak pianakné ené! Woé.. nak kéweh dadi Mangku ento tawang?! Berat sesanan mangkuné. Kondén buin misi ngapalang mantra aéng liuné. Malajah nguyeng genta apang beneh. Mabaju soroh putih-putih doén! Béhhh... Yan Nanang ngenehang jeg setres bana. Masalahné, suba final sing dadi nolak!," Nang Tegteg ngeplakin tendasné padidi, laut lanjut nyemak gelas kopiné, tur magerosan. 

"Né ulian Mangku malunan ngaé daya tawah-tawah. Iraga jani kenéna masalah. Yen sing Mangku Wayan Linglung mapamit uli Banjar, misi suud magama Hindu, nutug kurenan keduané si Mbak Yu céwék Kafé nto, késah ka Jawa masuk agaman né Luh. Kan sing benehné bli kena beban kéné! Aduhh..." 

"Sangkal berat oraang Nanang dadi Mangku! Ngeret indriyané ané kéweh. Ba dadi Mangku, nu lantas demen majudi, demen ka kafe, malua-luaan. Behh.. Capuh ksucian mangkuné. Tepuk tes unduk cara Mangku Linglung cara jani. Aruhhh..!," Nang Tegteg ngusap-usap muané. 

"Ndén malu bli, dong bli inguh kar ngayah dadi Mangku, ulian bli sing kar nyidang ke kafe? Malua-luaan? Kéto?!! Dong bli hoby kah selama né makéto-kétoan? Dong ké..! Sing tiang nyangka!" Mén Wayan masaut bangras. I Méngong bingung nepukin reramané. 

"Bah, méméné ené! Aéng énggalné brangti. Nanang nak ngoraang unduk Mangku Linglung, lan berat sesanan Mangkuné. Sing ja Nanang né demen kéto. Nyai jeg! Mangku to buka adane mangku, ada beban ané lakar gandong. Mangku masih kasambat jan banggul, juru sapuh, artiné iraga harus siap ngayah menék tuun. Makedas-kedas di Pura, masang  wastra di pelinggih. Siap iraga dadi pelayan umat, pelayan krama di banjar. Patut iraga nawang tatwa, susila, lan upakara lebih kin i krama. Tohh.. To mara monto, konden né lén-lén buin!"

"Oo.. Kadén ja! Men éngkén jani? Ba ja suba keputusan Final, sing jeg suba ja ngayah?, yen tiang nak oké-oké gén bli!" patakon Mén Wayan nyekenang.

"Nah, Ba ja nyai nyak, Bli ba sing ngelah pilihan, ngayah suba. Kéwala sekenang ragané méméné, iraga nyalanang swadharma baruné ené! Buin mani ajaka nangkil bareng ka griyan nak Lingsir, patut iraga ngalih guru, ngalih nabé. Apang da pelih iraga nyalanang sesana." 

"Nah bli." 

I Méngong bingung unduk apa né tuturanga baan reramané, iya sing ambil pusing, enggalanga mragatang jaitan porosné, wireh iya lakar ada rapat zoom jam kutus ajak sekaa trunané. Puput (PKJ, Kendari, 09052021)