Gigisin Bedik Ngaba Sebeng, Jele Melah Nak Matimpal

Blijul jak memek jak guru

Ton, da ja bes aeng ngaba sebeng, jeg merasa paling mangkana pesan idup entene. Cara ane lenan paling jelek, sing ngelah aji. Biasang gen ton, slow keto nak ngorang. Da bes bangga mara ente jani duuran, nak ada galahne ente kar maguyang beten. Buka ketekan rodan pedatine, jani baduuran, mani bisa betenan, idup nak berputar. Pang da sedih kingking bin pidan yen maan duman di beten. 

Mai paek jak raga malu, baanga ja tutur melah. Sing ja tutur wayah, nak tutur melah. Anggon jalaran ngalih galah, mulih ka tanah wayah, apang sida bungah. 

Kene nto ton! 

Hidup dadi manusa nganut Bhagavad Gītā Adyaya XIII Sloka 8, ada nenem pikobet idup ane negul i manusa di marcapada. Kene munyin slokane. 

indriyārtheṣu vairāgyam   anahaṅkāra eva ca, janma-mṛtyu-jarā-vyādhi-duḥkha-doṣānudarśanam.

Artosnyane:

Ketidak inginan akan keduniawian, lenyapnya ke-aku-an dan pemahaman akan keburukan kelahiran, kematian, usia tua, sakit dan kesengsaraan.

Nah, uli slokane ene, napi manten pikobet idupe sane kebancahang? Wenten...

1. Janma: makejang manusane ada ulian lekad, kelahiran. Lekad ka marcapada nak tuah iraga nyalanin samsara. Suba pasti lakar nepukin suka, duka, lara pati. Abesik sukane, tetelu jelekne. Ohh, maen to! 
2. Mrtyu: ane lekad pasti lakar mati. Sing ada ane lekad lakar kekal, Bhatara Wisnu doen ane numitis pinaka Avatara, puput tugasne di marcapada nyalanin kematian masih, dong kalingan iraga!
3. Jara: ane idup pasti lakar tua/lingsir. Surya doen endag kangin enceb kauh, keto masih iraga manusa, lekad dadi rare, tumbuh dadi yowana, bagus jegeg, sakewala sing ja makelo, pasti lakar tua. Nyidang sing kar awet yowana, sangkal iraga idup sing baanga mabuk ulian masa muda.  
4. Vyadhi: ane idup pasti taen gelem/sakit. Nak suba rwa bhineda, taen seger, pasti taen sakit. Sakit nto sing ja jasmani, awak doen. Ada ane madan sakit jiwa/rohani, ada sakit hati/keneh. Sakit masih nto. Jelema ane ngendah-ngendah di gumine, ngangin kauh ngaba bikas, nak jelema sakit masih to. Toh... Toh... to keto!
5. Duhkha: sakancan jadma ne idup pastika ngrasayang tur taen sebet, kasengsaran, kesedihan. Ija ye baanga idup to jeg happy-happy doen! Pasti ada sebet, sengsarane. Kwala nak ne anggon ngelatih iraga dadi manusa kuat menjalani idup, kawekasan siddha dadi manusa ane sujana. 
6. Dosa: sakancan jadma taen berbuat dosa. Gede cenik dosane ento sing nyidang baan ngukur padidi, apa buin nak len ne ngukur. Tuah Sang Hyang Widhi Wasa ane nyidang nentuang kadar dosan iraga. Buin inget, singa ada dosa di Hindu dihapuskan nyen. Nak ane madan dosa ya dosa, ane madan phala ya phala. 

Ingetang, nenem ento liune. Sakewala ento sing mangkuh baan anggo sesel. Nak mula i manusa lekad di gumine mabekel jele kalawan melah. Patut iraga inget, sing ja jele doen ane bekelang, melahe masih ngatut di palekadan iragane dadi manusa. Apa men ento melahne dadi manusa? Di Kitab Suci sarasamuscaya Sloka 2-6 ditu suba kabancahang luih iraga dadi manusa. 

Tuah dadi manusa kocapang nyidang malaksana jele kalawan melah, baik buruk. Lebur patutne laksana corah ento ring laksana ane melah. ento kotaman iraga dadi manusa. 

Ento mawinan da pesan nyen iraga nyesel awak idup dadi manusa, yadiastun lekade sing ja makmur kalimpahan baan brana. Patut paramasuksma suba lekad dadi manusa, mapan maan kesempatan lekad dadi manusa ento sulit/sukeh/sukil. 

Lekad dadi manusa ento tuah utama, apa makada keto? Mapan nyidang nulungin awak uli samsara, lekad lan mati berulang-ulang, uli laksana ane melah di marcapada. Buina sing ja nulungin awak padidi doen, nyidnag masih nulungin mahkluk lenan, apang nyidnag nincap di palekadane ane kar teka.

Melahang pesan ngangonang idupe ane jani, apan nak keweh nyidang lekad dadi manusa. Anggon idupe jani pinaka undagan apang nyidang menek ka suargan, apa ja ane makada iraga ulung ka dosa, sesidan-sidane kelidin.  

Tah amonto doen nyen tuture ene Ton! Ingetang tuture ene buka nuduk ulungan buah gatep, ada ne misi ada masih ne puyung. Lamun ada pelih baan raga nuturang, aksamayang nyen ton. 

Kendari, 21 Juli 2023

Blijul